ନୂଆଦିଲ୍ଲୀ: ଅହମଦାବାଦ ବିମାନ ଦୁର୍ଘଟଣାରେ ଆଖି ବୁଜିଛନ୍ତି ଗୁଜୁରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାଣୀ । ସେ ଏଆଇ-୧୭୧ ବିମାନରେ ଅହମଦାବାରୁ ଲଣ୍ଡନ ଯାତ୍ରା କରୁଥିଲେ । ତେବେ ବିଜୟ ରୂପାଣୀ କେଉଁଠିକୁ ଯାଉଥିଲେ କାହା ପାଖକୁ ଯାଉଥିଲେ ବୋଲି ଯେଉଁ ପ୍ରଶ୍ନ ଉଠୁଥିଲା ତାହା ସ୍ପଷ୍ଟ ହୋଇଛି । ବିଜୟ ରୂପାଣୀ ବିମାନରେ ବସି ଅହମଦାବାରୁ ଲଣ୍ଡନ ଯାତ୍ରା କରୁଥିଲେ । ଆଉ ସେ ତାଙ୍କ ପତ୍ନୀ ଅଞ୍ଜଳି ଏବଂ ଝିଅଙ୍କ ପାଖକୁ ଯାଉଥିଲେ । ମନରେ କେତେ ସ୍ବପ୍ନ କେତେ ଇଚ୍ଛା ନେଇ ସ୍ତ୍ରୀ ଓ ପିଲାଙ୍କୁ ଦେଖା କରିବାକୁ ଯାଉଥିଲେ ହେଲେ କିଏ ଜାଣିଥିଲା ଯାତ୍ରା ଆରମ୍ଭ ହେଉ ହେଉ ହିଁ ଯାତ୍ରା ସରିଯିବ ବୋଲି । ପତ୍ନୀ ଓ ପିଲାକୁ ଭେଟିବାର ଇଚ୍ଛା ଆକାଶରେ ଜଳିଯିବ ବୋଲି… ହଁ ଆଜ୍ଞା ବିଜୟ ରୂପାଣୀଙ୍କ ଲଣ୍ଡନ ଯାଇ ଝିଅ ଓ ପତ୍ନୀଙ୍କୁ ଭେଟିବାର ସ୍ବପ୍ନ ଅଧୁରା ରହିଗଲା । ଖାଲି ରୂପାଣୀ ନୁହଁନ୍ତି ମୃତ ୨୦୪ ଜଣଙ୍କ ମଧ୍ୟ ଗୋଟେ ଗୋଟେ ଯାତ୍ରା ପଛର କାହାଣୀ ଥିବ ।
ଏୟାର ଇଣ୍ଡିଆ ବିମାନ ଦୁର୍ଘଟଣାରେ ଗୁଜୁରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାଣୀଙ୍କ ଅହମଦାବାଦରେ ମୃତ୍ୟୁ ଘଟିଛି । ଗୁରୁବାର ଏହି ବିମାନଟି ଅହମ୍ମଦାବାଦର ସର୍ଦ୍ଦାର ବଲ୍ଲଭଭାଇ ପଟେଲ ବିମାନବନ୍ଦରରୁ ଲଣ୍ଡନ ଯାଉଥିଲା । ରୂପାଣୀ ପତ୍ନୀ ଓ ଝିଅଙ୍କୁ ଭେଟିବା ପାଇଁ ଲଣ୍ଡନ ଯାଉଥିଲେ । ଗୁଜୁରାଟ ବିଜେପି ମୁଖ୍ୟ ସି.ଆର. ପାଟିଲ ତାଙ୍କ ମୃତ୍ୟୁକୁ ନେଇ ଶୋକ ପ୍ରକାଶ କରିଛନ୍ତି । ସି.ଆର. ପାଟିଲ କହିଛନ୍ତି ଯେ ସେ ତାଙ୍କ ପରିବାରକୁ ଭେଟିବାକୁ ଯାଉଥିଲେ, ସେ ଏହି ଦୁର୍ଘଟଣାର ଶିକାର ହୋଇଥିଲେ । ଭଗବାନ ତାଙ୍କ ଆତ୍ମାକୁ ଶାନ୍ତି ଦିଅନ୍ତୁ ।
ବିମାନ ଦୁର୍ଘଟଣା ବାବଦରେ ସୂଚନା ପାଇବା ପରେ ବିଜୟ ରୂପାଣୀଙ୍କ ପାଖ ପଡ଼ିଶାରେ ଏକ ଅସହଜ ନିରବତା ଖେଳି ଯାଇଥିଲା । ପଡ଼ୋଶୀମାନେ ତାଙ୍କ ଘର ପାଖରେ ଥିବା ଏକ ମନ୍ଦିରରେ ପୂଜାର୍ଚ୍ଚନା କରିବା ଆରମ୍ଭ କରିଦେଇଥିଲେ । ବର୍ତ୍ତମାନ ସୁଦ୍ଧା ରୂପାଣୀଙ୍କ ପରିବାର ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।
ଭାରତ ପାଇଁ ଆଜି ଥିଲା ଅଶୁଭ ଗୁରୁବାର । ଗୁଜରାଟର ଅହମ୍ମଦାବାଦରୁ ଲଣ୍ଡନ ଯାଉଥିବା ଏୟାର ଇଣ୍ଡିଆ ବିମାନ ଏଆଇ-୧୭୧ ଦୁର୍ଘଟଣାଗ୍ରସ୍ତ ହୋଇଛି । ରନ୍ୱେରୁ ଟେକ୍ଅଫ୍ କରିବାର ୫ ମିନିଟ୍ ମଧ୍ୟରେ ଆକାଶରୁ ଖସିପଡ଼ିଥିଲା ଏହି ବିମାନ । ଆଉ ତାପରର ଦୃଶ୍ୟ ଥିଲା ବେଶ ଭୟାବହ । ପ୍ରଚଣ୍ଡ ଶବ୍ଦ ସହ ଭୟଙ୍କର ବିସ୍ଫୋରଣ । ନିଆଁପିଣ୍ଡୁଳା ପାଲଟି ଯାଇଥିଲା ପୂରା ବିମାନ । ହୁତୁହୁତୁ ହୋଇ ଜଳୁଥିଲା ବିମାନ । ଏହାପରେ ମେଘାନୀନଗର ଆକାଶରେ ଖେଳି ଯାଇଥିଲା କଳାଧୂଆଁର ବଳୟ । ଆଖପାଖ ଅଞ୍ଚଳ ବି ପୂରା ଧୂଆଁମୟ ହୋଇଯାଇଥିଲା ।
ବିମାନରେ କ୍ର୍ୟୁ ମେମ୍ବରଙ୍କ ସହ ୨୪୨ ଜଣ ଯାତ୍ରୀ ରହିଥିଲେ । ୧୬୯ ଭାରତୀୟ, ୫୩ ବ୍ରିଟିଶ, ୭ ପର୍ତ୍ତୃଗାଲ ଓ ଜଣେ କାନାଡା ନାଗରିକଙ୍କୁ ନେଇ ଉଡ଼ାଣ ଭରିଥିଲା ବିମାନ । କିନ୍ତୁ କେଇ ମିନିଟ ମଧ୍ୟରେ ଦେଖିବାକୁ ମିଳିଥିଲା ମୃତ୍ୟୁର ମହାତାଣ୍ଡବ । ଯାତ୍ରୀଙ୍କ ମଧ୍ୟରୁ ଅଧିକାଂଶ ଲୋକଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଏବେ ମୃତ୍ୟୁସଂଖ୍ୟା ୨୦୦ ଟପିଲାଣି । ବିମାନଟି ଅଧିକାଂଶ ଅଂଶ ଜଳି ଯାଇଥିବାରୁ ମୃତ୍ୟୁସଂଖ୍ୟା ଆହୁରି ବୃଦ୍ଧି ପାଇପାରେ । ବିମାନରେ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାଣୀ ଯାତ୍ରା କରୁଥିଲେ ।
