ନୂଆଦିଲ୍ଲୀ : ରାହୁଲ ପୁଣି ଆମେଥିରୁ ଲଢିବେ ବୋଲି ଉତ୍ତରପ୍ରଦେଶରେ ନବନିଯୁକ୍ତ କଂଗ୍ରେସ ସଭାପତି ଅଜୟ ରାୟଙ୍କ ଦାବି ପରେ ରାଜନୀତିର ତାପମାତ୍ରା ଯଥେଷ୍ଟ ବୃଦ୍ଧି ପାଇଛି। ଏହାକୁ ନେଇ ବିଜେପି ଓ କଂଗ୍ରେସ ମଧ୍ୟରେ ମଧ୍ୟ ବାକ୍ ଯୁଦ୍ଧ ଆରମ୍ଭ ହୋଇଯାଇଛି।
ଭାରତୀୟ ଜନତା ପାର୍ଟି (ବିଜେପି) ଅଭିଯୋଗ କରିଛି ଯେ ଗାନ୍ଧିପରିବାର ସର୍ବଦା ଆମେଥିବାସୀଙ୍କୁ ବ୍ୟବହାର କରିଛି ଏବଂ ଏହି ନିର୍ବାଚନ ମଣ୍ଡଳୀକୁ ନିଜର ବ୍ୟକ୍ତିଗତ ସମ୍ପତ୍ତି ଭାବରେ ବିବେଚନା କରୁଛି।
ପୂର୍ବତନ କେନ୍ଦ୍ରମନ୍ତ୍ରୀ ତଥା ବିଜେପି ନେତା ମୁଖତାର ଅବ୍ବାସ ନକଭି କହିଛନ୍ତି ଯେ ଗାନ୍ଧୀ ପରିବାର ଆମେଥିବାସୀଙ୍କୁ ଚୁଇଙ୍ଗମ୍ ଭାବେ ବ୍ୟବହାର କରିଛନ୍ତି। କଂଗ୍ରେସ ଆମେଥିକୁ ନିଜ ପରିବାରର ବ୍ୟକ୍ତିଗତ ସମ୍ପତ୍ତି ଭାବେ ବିବେଚନା କରିବା ସହ ଲୋକଙ୍କୁ ଚୁଇଙ୍ଗମ୍ ଭଳି ଚବାଇ ଚାଲିଥିଲା । ଏବେ ସେଠାକାର ଲୋକେ ସେମାନଙ୍କୁ କ୍ଷମା କରିବେ ନାହିଁ। ଯଦି ସେ ଭାବୁଛନ୍ତି ଯେ ପାରିବାରିକ ଟଫି ତାଙ୍କୁ କ୍ଷମା କରିପାରିବ, ତେବେ ଏହା ହେବ ନାହିଁ ବୋଲି ସେ କହିଛନ୍ତି।
ରାହୁଲ ଗାନ୍ଧିଙ୍କ ପୂର୍ବରୁ ସଞ୍ଜୟ ଗାନ୍ଧୀ, ରାଜୀବ ଗାନ୍ଧୀ, ସୋନିଆ ଗାନ୍ଧୀ ମଧ୍ୟ ଏଠାରୁ ନିର୍ବାଚନ ଲଢ଼ି ବିଜୟୀ ହୋଇଛନ୍ତି। ରାହୁଲ ଗାନ୍ଧି ୨୦୦୪ ମସିହାରୁ ଆମେଠି ଆସନରେ ଥିଲେ। ୨୦୧୯ରେ ତାଙ୍କୁ ପ୍ରଥମ ଥର ପାଇଁ ସ୍ମୃତି ଇରାନୀଙ୍କ ଠାରୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା।
