୭ ଆହତ, ୧୨ ବାଇକ୍ ଭାଙ୍ଗିଲେ, ଜାତୀୟ ରାଜପଥ ଅବରୋଧ
ଧଉଳି: ଧଉଳି ଥାନା ଅଧୀନ ଶିଶୁପାଳଗଡ଼ ଅଞ୍ଚଳର ଏକ ନିଛାଟିଆ ସ୍ଥାନରେ ବସି ୮ ଜଣ ନିଶାଡ଼ି ମଦ ପିଇଲେ। ନିଶାରେ ଚୁର୍ ହୋଇ ଶିଶୁପାଳଗଡ଼ ଗାଁ ଭିତରେ ପଶିଲେ। ପ୍ରଥମେ ଗାଁରେ ପଇଁତରା ମାରିଥିଲେ। ଗାଡ଼ି ସାଇଡ୍ ମାରିବା ବାହାନାରେ ଜଣେ ଯୁବକଙ୍କୁ ଆକ୍ରମଣ କରିଥିଲେ। ପତିତପାବନ କ୍ଲବ ସମ୍ମୁଖରେ ଲୋକଙ୍କୁ ଗାଳିଗୁଲଜ କଲେ। ହାତରେ ଖଣ୍ଡା, ଗୁପ୍ତି ଓ ଭୁଜାଲି ଭଳି ମାରଣାସ୍ତ୍ର ଧରି ଗାଁ କ୍ଲବ ଘର, ଶିଶୁପାଳଗଡ଼ ଛକ ଓ ନୂଆଗାଁ ଛକରେ ଯାହାକୁ ପାଇଲେ ଗୋଡ଼େଇ ଗୋଡ଼େଇ ହାଣିଲେ। ପ୍ରତିବାଦ କରିବାରୁ ୭ଜଣ ଯୁବକଙ୍କୁ ଆକ୍ରମଣ କରିଥିଲେ। ଆହତ ଯୁବକମାନେ ହେଲେ କାହ୍ନା, ତପନ, ଲୁଲୁ ଏବଂ ପିଣ୍ଟୁ। ଅନ୍ୟ ୩ ଆହତଙ୍କ ପରିଚୟ ମିଳିପାରି ନାହିଁ। ନିଶାଡ଼ିମାନେ ୧୨ଟି ଗାଡ଼ିକୁ ଭଙ୍ଗାରୁଜା କରିଥିଲେ।
ଉତ୍ତ୍ୟକ୍ତ ଯୁବକଙ୍କ ଉତ୍ପାତ ଦେଖି ଲୋକେ ଆତଙ୍କିତ ହୋଇପଡ଼ିଥିଲେ। ଏହାପରେ ସେମାନେ ଶିଶୁପାଳଗଡ଼ ଛକରେ ପହଞ୍ଚି ରାଖି ଦୋକାନ କରିଥିବା ଜଣେ ଯୁବକଙ୍କୁ ଆକ୍ରମଣ କରିଥିଲେ। ତା’ ପରେ ନୂଆଗାଁ ଛକରେ ଜଣେ ପରିବା ଦୋକାନୀକୁ ଆକ୍ରମଣ କରି ଫେରାର ହୋଇ ଯାଇଥିଲେ। ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ଗଣ୍ଡଗୋଳ ଘଟିଥିବା କୁହାଯାଉଛି। ପରିବାରଲୋକ ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରିଛନ୍ତି। ଆକ୍ରମଣକାରୀ ଯୁବକମାନଙ୍କ ମଧ୍ୟରେ ମୁଖ୍ୟ ଅଭିଯୁକ୍ତ ଶିଶୁପାଳଗଡ଼ ଅଞ୍ଚଳର। ସେ ତା’ର ସହଯୋଗୀ ଯୁବକମାନଙ୍କୁ ଡକାଇ ଆତଙ୍କ ଖେଳାଇଥିବା ଜଣାପଡ଼ିଛି।
ଅପରପକ୍ଷରେ ଆକ୍ରମଣକାରୀଙ୍କୁ ତୁରନ୍ତ ଗିରଫ ଦାବିରେ ସ୍ଥାନୀୟ ଅଞ୍ଚଳର ବହୁ ଯୁବକ ପହଞ୍ଚି ଶିଶୁପାଳଗଡ଼ ଛକ ନିକଟରେ ଜାତୀୟ ରାଜପଥ ଅବରୋଧ କରିଥିଲେ। ଫଳରେ ଦୀର୍ଘ ସମୟ ଧରି ଟ୍ରାଫିକ ସମସ୍ୟା ଦେଖାଦେଇଥିଲା। ଧଉଳି ଥାନା ଅଧିକାରୀ ଚିତ୍ତରଞ୍ଜନ ରାଉତ ଓ ଜୋନ-୨ ଏସିପି ଗିରିଜା ଶଙ୍କର ଚକ୍ରବର୍ତ୍ତୀ ପୁଲିସ ଫୋର୍ସ ସହିତ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତାରୋକ ପ୍ରତ୍ୟାହୃତ ହୋଇଥିଲା। ରିପୋର୍ଟ ଲେଖା ହେବା ବେଳକୁ ପୁଲିସ ଆକ୍ରମଣକାରୀଙ୍କ ମଧ୍ୟରୁ କାହାକୁ ଗିରଫ କରିପାରିନଥିବା ଜଣାପଡ଼ିଛି।
