ସରକାରୀ ସ୍କୁଲରୁ ୩୦ କିଲୋମିଟର ଦୂରରୁ ଆସୁଥିବା ଛାତ୍ରଛାତ୍ରୀଙ୍କୁ ମିଳିବ ମାଗଣା ବସ ସୁବିଧା – Utkal Mail

ଚଣ୍ଡୀଗଡ଼: ପଞ୍ଜାବର ସ୍କୁଲ ଯାଉଥିବା ଛାତ୍ରଛାତ୍ରୀଙ୍କ ପାଇଁ ଆଜି ଏକ ବଡ ଘୋଷଣା କରିଛନ୍ତି ଆପ ସରକାର | ଖୋଦ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି ଘୋଷଣା କରିଛନ୍ତି | ‘ସ୍କୁଲ ଅଫ୍ ଏମିନେନ୍ସ’ ନାମକ କାର୍ଯ୍ୟକ୍ରମର ଉଦଘାଟନୀ ସମାରୋହରେ ଅରବିନ୍ଦ କେଜ୍ରିୱାଲ କହିଛନ୍ତି ଯେ ଆମେ ଦିଲ୍ଲୀର ବିଦ୍ୟାଳୟଗୁଡ଼ିକୁ ଉତ୍କୃଷ୍ଟ କରିଛୁ। ମୁଁ ଖୁସି ଯେ ଦିଲ୍ଲୀ ପରେ ବର୍ତ୍ତମାନ ଭଗବନ୍ତ ମାନଙ୍କର ପଞ୍ଜାବ ସରକାର ପଞ୍ଜାବରେ ସମାନ ଶିକ୍ଷା ବିପ୍ଳବ ଆରମ୍ଭ କରିଛନ୍ତି। ଅମୃତସରର କୌଣସି ଘରୋଇ ବିଦ୍ୟାଳୟରେ ଏପରି ସୁବିଧା ନାହିଁ ଯାହା ସରକାରୀ ବିଦ୍ୟାଳୟରେ ଯୋଗାଇ ଦିଆଯାଉଛି। ଏହି ସମୟରେ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି ଯେ ସରକାରୀ ବିଦ୍ୟାଳୟର ୩୦ କିଲୋମିଟର ଭିତରେ ରହୁଥିବା ପିଲାମାନେ ମାଗଣା ବସ୍ ସେବା ପାଇବେ।

କେଜ୍ରିୱାଲ ଆହୁରି କହିଛନ୍ତି ଯେ, ନିର୍ବାଚନ ପୂର୍ବରୁ ଆମେ ଏକ ଗ୍ୟାରେଣ୍ଟି ଦେଇଥିଲୁ ଯେ, ଆପଣମାନଙ୍କ ପିଲାମାନଙ୍କୁ ଶିକ୍ଷିତ କରାଇବା ଆମର ଦାୟିତ୍ୱ | ଆଜିଠାରୁ ସେହି ସ୍ୱପ୍ନ ପୂରଣ ଆରମ୍ଭ ହୋଇଛି | ସେହିପରି ପଞ୍ଜାବର ଶିକ୍ଷା ମନ୍ତ୍ରୀ ହରଜୋତ ସିଂ କହିଛନ୍ତି ଯେ ସମସ୍ତ ସରକାରୀ ପ୍ରାଥମିକ, ମଧ୍ୟମ, ଉଚ୍ଚ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟରେ ହାଇସ୍ପିଡ଼ ଇଣ୍ଟରନେଟ୍ ସୁବିଧା ଯୋଗାଇ ଦିଆଯିବ | ଏଥିପାଇଁ ଶିକ୍ଷା ବିଭାଗ ବିଏସଏନଏଲ ଓ ଆଇବିଏମ ସହ ଏମଓୟୁ ସ୍ଵାକ୍ଷର କରିଛି | ଶିକ୍ଷା ମନ୍ତ୍ରୀ ଘୋଷଣା କରିଛନ୍ତି ଯେ ବର୍ତ୍ତମାନ ପଞ୍ଜାବର ସରକାରୀ ବିଦ୍ୟାଳୟରେ ପିଲାମାନେ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ରେ ମଧ୍ୟ ଶିକ୍ଷା ପାଇବେ। ଡିସେମ୍ବର ସୁଦ୍ଧା ପଞ୍ଜାବର ପ୍ରତ୍ୟେକ ବିଦ୍ୟାଳୟରେ ହାଇ ସ୍ପିଡ୍ ଇଣ୍ଟରନେଟ୍ ଏବଂ ୱାଇଫାଇ ସହିତ ସଂଯୁକ୍ତ ହେବ।