ଆମେ ତେଲେଙ୍ଗାନର ବିକାଶ ଚାହୁଁ, କଂଗ୍ରେସ-ଟିଆରଏସ ପରିବାରର ବିକାଶ ଚାହାନ୍ତି: ଅମିତ ଶାହା – Utkal Mail

ସୂର୍ଯ୍ୟପେଟ: ଆମେ ତେଲେଙ୍ଗାନର ବିକାଶ ଚାହୁଁ। କଂଗ୍ରେସ-ଟିଆରଏସ ପରିବାରର ବିକାଶ ଚାହାନ୍ତି। କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଶୁକ୍ରବାର ଦିନ ଏକ ସଭାକୁ ସମ୍ବୋଧିତ କରି ଏଭଳି କହିଛନ୍ତି। ଏହା ସହ ସେ କହିଛନ୍ତି ଯେ, ଯଦି ବିଜେପି କ୍ଷମତାକୁ ଆସିବ ତେବେ ତେଲେଙ୍ଗାନାର ପରବର୍ତ୍ତୀ ମୁଖ୍ୟମନ୍ତ୍ରୀ ପଛୁଆ ବର୍ଗର ହେବେ। ଏଭଳି କହି ବିଜେପିର ବରିଷ୍ଠ ନେତା ନଭେମ୍ବର ୩୦ରେ ହେବାକୁ ଥିବା ବିଧାନସଭା ନିର୍ବାଚନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାରକୁ ଭୋଟ୍ ଦେବା ପାଇଁ ତେଲେଙ୍ଗାନାବାସୀଙ୍କୁ ଅନୁରୋଧ କରିଥିବା ଜଣାପଡ଼ିଛି।

ସୂର୍ଯ୍ୟପେଟରେ ‘ଜନ ଗର୍ଜନ ସଭା’କୁ ସମ୍ବୋଧିତ କରି ଶାହା କହିଛନ୍ତି ଯେ, କେ ଚନ୍ଦ୍ରଶେଖର ରାଓଙ୍କ ନେତୃତ୍ୱାଧୀନ ଟିଆରଏସ (ବିଆରଏସ) କିମ୍ବା କଂଗ୍ରେସ ତେଲେଙ୍ଗାନାର ବିକାଶ କରିପାରିବ ନାହିଁ। କେବଳ ବିଜେପି ହିଁ ଏହାକୁ ସମ୍ଭବ କରିପାରିବ। ମୁଁ ତେଲେଙ୍ଗାନାର ଲୋକଙ୍କୁ କହିବାକୁ ଚାହେଁ ଯେ ସୋନିଆଜୀ କଂଗ୍ରେସ କିମ୍ବା କେସିଆରଙ୍କ ଟିଆରଏସ ରାଜ୍ୟକୁ ବିକାଶ ଆଣିବ ନାହିଁ। କାରଣ ଏହି ଦଳମାନେ ବଂଶବାଦ ରାଜନୀତିରେ ବିଶ୍ୱାସ କରନ୍ତି। ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ବରେ ହିଁ କେବଳ ବିଜେପି ରାଜ୍ୟରେ ବିକାଶ ଆଣିପାରିବ। ସୋନିଆଜୀ, ରାହୁଲ ଗାନ୍ଧୀଙ୍କୁ ପ୍ରଧାନମନ୍ତ୍ରୀ କରିବାକୁ ଚାହୁଁଥିବାବେଳେ କେସିଆର ତାଙ୍କ ପୁଅ କେଟିଆର (କେଟି ରାମା ରାଓ)ଙ୍କୁ ମୁଖ୍ୟମନ୍ତ୍ରୀ କରିବାକୁ ଚାହୁଁଛନ୍ତି। କେହି ବି ତେଲେଙ୍ଗାନା କଥା ଭାବୁନାହାନ୍ତି।

ଶାହା ପଛୁଆ ବର୍ଗରୁ ଜଣକୁ ମୁଖ୍ୟମନ୍ତ୍ରୀ ପ୍ରାର୍ଥୀ କରିବେ ବୋଲି ଦାବି କରି କହିଛନ୍ତି ଯେ, “ବିଆରଏସ୍ ଗରିବ ବିରୋଧୀ ଏବଂ ଦଳିତଙ୍କ ବିରୋଧୀ। ଜଣେ ଦଳିତଙ୍କୁ ମୁଖ୍ୟମନ୍ତ୍ରୀ କରିବେ ବୋଲି କେସିଆର ଦେଇଥିବା ପ୍ରତିଶ୍ରୁତିର କ’ଣ ହେଲା? ପଛୁଆ ବର୍ଗର ସଶକ୍ତିକରଣ ପାଇଁ ସେ ପ୍ରତିବର୍ଷ ୧୦,୦୦୦କୋଟି ଟଙ୍କା ଖର୍ଚ୍ଚ କରିବାକୁ ପ୍ରତିଶ୍ରୁତି ଦେଇଥିଲେ। ସେହି ପ୍ରତିଶ୍ରୁତିର ପୂରଣ ହୋଇଛି କି? ହେଲେ ବିଜେପି କ୍ଷମତାକୁ ଆସିଲେ ପଛୁଆ ବର୍ଗକୁ ଗୁରୁତ୍ବ ଦେବ ଏବଂ ପଛୁଆ ବର୍ଗରୁ ହିଁ ଜଣେ ତେଲେଙ୍ଗାନାର ମୁଖ୍ୟମନ୍ତ୍ରୀ ହେବେ।