ଜଗନ୍ନାଥଙ୍କ ମନ୍ଦିର ସହ ଚତୁର୍ଦ୍ଧା ମୂର୍ତ୍ତିଙ୍କ ନୂତନ ବିଗ୍ରହ ପ୍ରତିଷ୍ଠା, ଗାଁରେ ସୃଷ୍ଟି ହୋଇଛି ଆଧ୍ୟାତ୍ମିକ ପରିବେଶ

ଜଗନ୍ନାଥଙ୍କ ନୂତନ ମନ୍ଦିର ସହ ଚତୁର୍ଦ୍ଧା ମୂର୍ତ୍ତିଙ୍କ ନୂତନ ବିଗ୍ରହ ପ୍ରତିଷ୍ଠା ପାଇଁ ଉତ୍ସବ ମୁଖର ହୋଇଉଠିଛି ଭଦ୍ରକ ଚାନ୍ଦବାଲିର ଗଜଗିରି ଗାଁ । ସକାଳ ଠୁ ରାତି ପର୍ଯ୍ୟନ୍ତ ଚାଲିଛି ପୂଜାପାଠ । ହୋମ, ଯଜ୍ଞ ଓ ପଣ୍ଡିତଙ୍କ ମନ୍ତ୍ର ପାଠରେ ସମଗ୍ର ଗାଁ ସୃଷ୍ଟି ହୋଇଛି ଆଧ୍ୟାତ୍ମିକ ପରିବେଶ । ପୂଜା ପାଠ ସହ ଶହ ଶହ ଭକ୍ତଙ୍କ ପାଇଁ ମଧ୍ୟ ପ୍ରସାଦ ସେବନର ବ୍ୟବସ୍ଥା କରାଯାଇଛି । ଯାହାକି ଗାଁର ସମସ୍ତ ଲୋକ ନିଜ ନିଜ ପକେଟରୁ ଚାନ୍ଦା ଦେଇ ଏହି ମହତ କାର୍ଯ୍ୟ କରୁଛନ୍ତି ।

ସେ ଭକତ ଭାବରେ ବନ୍ଧା, ସେ ଭକ୍ତ ବତ୍ସଳ । କେତେବେଳେ ଭକତ ହାତରୁ ନଡିଆ ନିଏ ତ କେତେବେଳେ ସେ ଭକ୍ତର ବାଲି ରଥରେ ବି ବସେ । ଭକ୍ତର ଭାବନାକୁ ବୁଝେ ସେଥି ପାଇଁ ତ ତାକୁ ଭାବ ବିନୋଦିଆ କୁହାଯାଏ । ଯେତେବେଳେ ଭକ୍ତି ଓ ଆସ୍ଥାର କଥା ଆସେ ସେଠି ପଥର ବି ଠାକୁର ଭଳି ଦେଖା ଯାଆନ୍ତି । ତେବେ ସେହି ଜଗନ୍ନାଥଙ୍କୁ ନିଜ ଗାଁରେ ସ୍ଥାପିତ କରି ତାଙ୍କୁ ପ୍ରତିଦିନ ଦର୍ଶନ କରିବା ସହ ତାଙ୍କ ଆଶୀର୍ବାଦ ନେବା ପାଇଁ ଧୁମଧାମରେ ଚାଲିଛି ନୂତନ ବିଗ୍ରହ ପ୍ରତିଷ୍ଠା କାର୍ଯ୍ୟକ୍ରମ ।

ଦୀର୍ଘ ଦିନ ତଳେ ଏଠି ଏକ ଛୋଟିଆ ମନ୍ଦିର ଥିଲା । ଏଠାରେ ଜଣେ ମାତାଜୀ ରହୁଥିଲେ । ମାତାଜୀ ଜଣକ ଶିକ୍ଷେତ୍ର ବୁଲିବାକୁ ଯାଇଥିଲେ ସେଠାରୁ ଜଗନାଥଙ୍କୁ ନିଜ ପୁଅ ବୋଲି ଭାବି ଏକ ଜଗନ୍ନାଥ ମୂର୍ତ୍ତି ଆଣି ଗାଁରେ ପୂଜା କରୁଥିଲେ । କିନ୍ତୁ ହଠାତ ଦିନେ ମାତାଜୀ କୁଆଡେ ଚାଲିଗଲେ । ଯାହାପରେ ଗାଁ ଲୋକ ଏଠାରେ ଏକ ଜଗନ୍ନାଥ ମନ୍ଦିର କରିବେ ବୋଲି ନିଷ୍ପତ୍ତି ନେଇଥିଲେ । ଯାହା ଆଜି ସତ ହୋଇଛି । ଆଜି ଗାଁ ଲୋକଙ୍କ ଦୀର୍ଘ ଦିନର ଆଶା ପୂରଣ ହୋଇଛି ।

ମନ୍ଦିର ଓ ବିଗ୍ରହ ପ୍ରତିଷ୍ଠା ଉତ୍ସବ ପାଇଁ ପ୍ରଥମ ଦିନ ୧୦୮ ମହିଳାମାନେ କଳସ ଶୋଭାଯାତ୍ରାରେ ଯାଇ ଘଟ ସ୍ଥାପନ କରିଥିଲେ । ତିନି ଦିନ ବ୍ୟାପି ରୀତିନୀତି ଅନୁସାରେ ଚାଲିଥିଲା ପୂଜାର୍ଚନା । ଶେଷ ଦିନରେ ଚତୁର୍ଦ୍ଧାମୂର୍ତ୍ତି ମନ୍ଦିରକୁ ପ୍ରବେଶ କରିଥିଲେ । ତେବେ ଏ ଭଳି ଏକ ପବିତ୍ର କାର୍ଯ୍ୟରେ ଯୋଗ ଦେଇଛନ୍ତି ଶହ ଶହ ସଂଖ୍ୟକ ଭକ୍ତ । ମହାମନ୍ତ୍ର ଧ୍ୱନିରେ ଗୁଞ୍ଜରିତ ହେଉଛି ଯଜ୍ଞ ମଣ୍ଡପ । ମହାମନ୍ତ୍ରରେ ପ୍ରକମ୍ପିତ ହେଉଛି ସାରା ପରିବେଶ । ଯାହାକୁ ନେଇ ଗାଁରେ ସୃଷ୍ଟି ହୋଇଛି ଏକ ଆଧ୍ୟାତ୍ମିକ ପରିବେଶ ।