୨୦ ଦିନରେ ଗୋଟିଏ ପରିବାରରେ ୫ ଜଣଙ୍କ ମୃତ୍ୟୁ: ବିଷ ଦେଇ ମାରିଛନ୍ତି ପରିବାରର ୨ ମହିଳା – Utkal Mail
ମୁମ୍ବାଇ: ମହାରାଷ୍ଟ୍ର ଗଡ଼ଚିରୋଲିରେ ଗୋଟିଏ ପରିବାରରେ ୫ ଜଣ ସଦସ୍ୟଙ୍କର ମାତ୍ର ୨୦ ଦିନ ମଧ୍ୟରେ ରହସ୍ୟଜନକ ମୃତ୍ୟୁ ହୋଇଛି। ଏହି ମୃତ୍ୟୁ ଘଟଣାର କାରଣକୁ ନେଇ ସନ୍ଦେହ ଉପୁଜିଲା। ସମସ୍ତଙ୍କ ମୃତ୍ୟୁର କାରଣ ଗୋଟିଏ ହୋଇଥିବାରୁ ପୁଲିସ ଏନେଇ ସନ୍ଦେହ ପ୍ରକଟ କରିଥିଲା ଏବଂ ଘଟଣାର ତଦନ୍ତ ପାଇଁ ଏକ ସ୍ବତନ୍ତ୍ର ଟିମ୍ ଗଠନ ହେଲା। ଉକ୍ତ ଘଟଣାର ତଦନ୍ତ ହେବାପରେ ପରିବାରର ୨ ଜଣ ମହିଳାଙ୍କ ଦ୍ବାରା ରଚାଯାଇଥିବା ହତ୍ୟା ଷଡ଼ଯନ୍ତ୍ର ପଦାରେ ପଡ଼ିଯାଇଛି। ଉକ୍ତ ୨ ମହିଳାଙ୍କୁ ମଧ୍ୟ ପୁଲିସ ଆଜି ଗିରଫ କରିଛି। ମାମଲାରେ ଜଣେ ଅଭିଯୁକ୍ତ ସଂଘମିତ୍ରା ନିଜ ସ୍ବାମୀ ଏବଂ ଶାଶୁ ଶ୍ବଶୂରଙ୍କ ଉପରେ ଅସନ୍ତୁଷ୍ଟ ଥିଲା। ଅନ୍ୟ ଜଣେ ଅଭିଯୁକ୍ତ ରୋସା ସମ୍ପତ୍ତି ବିବାଦ ପାଇଁ ଅସନ୍ତୁଷ୍ଟ ଥିଲା। ଉଭୟ ମିଳିତ ଭାବେ ଏହି ହତ୍ୟା ଷଡ଼ଯନ୍ତ୍ର କରିଥିଲେ। ସେମାନେ ଆର୍ସେନିକ ବ୍ୟବହାର କରିଥିଲେ। ସେପ୍ଟେମ୍ବର ୨୦ ତାରିଖରେ ଶଙ୍କର କୁମ୍ଭରେ ଏବଂ ତାଙ୍କ ପତ୍ନୀ ବିଜୟାଙ୍କର ଫୁଡ୍ ପଏଜନିଂ ଲକ୍ଷଣ ଦେଖାଦେଲା ।
ସେମାନଙ୍କ ସ୍ବାସ୍ଥ୍ୟାବସ୍ଥା ହଠାତ୍ ବିଗିଡ଼ିଗଲା। ଶରୀର ଯନ୍ତ୍ରଣା ହେବା ସହ ଛାତିରେ ଯନ୍ତ୍ରଣା ହେଲା। ସେମାନଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା। ସେପ୍ଟେମ୍ବର ୨୬ରେ ଶଙ୍କରଙ୍କର ମୃତ୍ୟୁ ହୋଇଗଲା ଏବଂ ଏହାର ଦିନକ ପରେ ତାଙ୍କ ପତ୍ନୀଙ୍କର ମୃତ୍ୟୁ ହେଲା। ସେମାନଙ୍କ ୨ ଝିଅ କୋମଲ ଏବଂ ଆନନ୍ଦ ଏବଂ ଗୋଟିଏ ପୁଅ ରୋଶନ କୁମ୍ଭରେ ବି ହସ୍ପିଟାଲ୍ରେ ଚିକିତ୍ସାଧୀନ ଥିଲେ। କୋମଲଙ୍କର ଅକ୍ଟୋବର ୮ରେ ମୃତ୍ୟୁ ହୋଇଥିବାବେଳେ ଆନନ୍ଦଙ୍କର ଅକ୍ଟୋବର ୧୪ ଏବଂ ରୋଶନ କୁମ୍ଭରେଙ୍କର ଏହାର ଦିନକ ପରେ ମୃତ୍ୟୁ ହେଲା। ପରିବାର ସଦସ୍ୟଙ୍କ ମୃତ୍ୟୁ ଖବର ଶୁଣି ଶଙ୍କର କୁମ୍ଭରେଙ୍କ ବଡ଼ ପୁଅ ସାଗର କୁମ୍ଭରେ ଦିଲ୍ଲୀରୁ ଘରକୁ ଚାଲି ଆସିଥିଲେ। କିନ୍ତୁ ଘରକୁ ଆସିବାପରେ ସେ ମଧ୍ୟ ଅସୁସ୍ଥ ହୋଇଗଲେ। କୁମ୍ଭରେଙ୍କ ଡ୍ରାଇଭର ରାକେଶ ମାଦଭିଙ୍କ ସ୍ବାସ୍ଥ୍ୟାବସ୍ଥା ମଧ୍ୟ ବିଗିଡ଼ିଗଲା। ସେହିପରି ପରିବାରର ଜଣେ ସମ୍ପର୍କୀୟ ପରିବାରର ଏଭଳି ବିପଦ ସମୟରେ ଆସିଥିବାବେଳେ ସେ ନିଜେ ବିପଦରେ ପଡ଼ିଗଲେ। ତେବେ ଉକ୍ତ ୩ ଜଣଙ୍କ ସ୍ବାସ୍ଥ୍ୟାବସ୍ଥା ଏବେ ସ୍ଥିର ଅଛି।
ପରିବାରରେ ଯେଉଁ ୫ ଜଣଙ୍କର ମୃତ୍ୟୁ ହୋଇଛି ସମସ୍ତଙ୍କର ଲକ୍ଷଣ ଗୋଟିଏ। ସମସ୍ତଙ୍କର ଗୋଡ଼ ଏବଂ ପିଠିରେ ଯନ୍ତ୍ରଣା, ମୁଣ୍ଡ ବିନ୍ଧା ଏବଂ ଓଠ କଳାପଡ଼ିବା ଭଳି ଲକ୍ଷଣ ଦେଖାଦେଇଥିଲା। ଏମାନଙ୍କୁ ବିଷ ଦିଆଯାଇଥିବା ମେଡିକାଲ ଅଫିସର ସନ୍ଦେହ କଲେ। ଉକ୍ତ ଘଟଣାର ତଦନ୍ତ ପାଇଁ ୪ଟି ଟିମ୍ ଗଠନ ହେଲା। ଘଟଣାର ତଦନ୍ତ ହେବାପରେ ୨ ମହିଳା ସଂଘମିତ୍ରା ଏବଂ ରୋସାଙ୍କୁ ଗିରଫ କରାଯାଇଛି। ତଦନ୍ତରୁ ଜଣାପଡ଼ିଛି ଯେ ଶଙ୍କର କୁମ୍ଭରେଙ୍କ ବୋହୂ ଏବଂ ରୋଶନ କୁମ୍ଭରେଙ୍କ ପତ୍ନୀ ସଂଘମିତ୍ରା ସେମାନଙ୍କ ଉପରେ ଅସନ୍ତୁଷ୍ଟ ଥିଲା। ସଂଘମିତ୍ରା ନିଜ ବାପା ମା’ଙ୍କ ଇଚ୍ଛା ବିରୁଦ୍ଧରେ ରୋଶନଙ୍କୁ ବିବାହ କରିଥିଲା। ଗତ କିଛି ମାସତଳେ ତା’ ବାପା ଆତ୍ମହତ୍ୟା କରିଦେଲେ। ସେବେଠାରୁ ସେ ବିଷାଦରେ ଥିଲା। ପରିବାର ଲୋକ ବି ସବୁବେଳେ ତାକୁ ଲଗାତାର ଭାବେ ତାତ୍ସଲ୍ୟ କରୁଥିବାରୁ ସେ ରାଗି ଯାଇଥିଲା ବୋଲି ପୁଲିସ କହିଛି। ଅନ୍ୟପକ୍ଷେ ରୋସା ହେଉଛି ବିଜୟା କୁମ୍ଭରେଙ୍କ ନଣନ୍ଦ। ସେ ସେମାନଙ୍କ ଘର ନିକଟରେ ରହେ । ଶଙ୍କର କୁମ୍ଭରେଙ୍କ ପତ୍ନୀ ଏବଂ ତାଙ୍କ ଭଉଣୀମାନଙ୍କ ସହ ରୋସାଙ୍କ ସ୍ବାମୀଙ୍କର ପୈତୃକ ସମ୍ପତ୍ତି ଭାଗବଣ୍ଟାକୁ ନେଇ ବିବାଦ ରହିଥିଲା। ସଂଘମିତ୍ରା ଏବଂ ରୋସା ହାତ ମିଳାଇ ସେମାନଙ୍କ ପରିବାର ସଦସ୍ୟଙ୍କୁ ହତ୍ୟା କରିଛନ୍ତି।
