ନବରଙ୍ଗପୁର : ଚାଷୀ ସମସ୍ୟାକୁ ନେଇ ରାଜରାସ୍ତାରେ ଆଳୁ ଓ ପିଆଜ ମାଳ ପକାଇ ଜିଲ୍ଲା ଯୁବ କଂଗ୍ରସ ବିକ୍ଷୋଭ ପ୍ରଦର୍ଶନ କରିଛି । ନବରଙ୍ଗପୁର ଜିଲ୍ଲା ଯୁବ କଂଗ୍ରେସ ସଭାପତି ଦ୍ୱାରିକା ମହାପାତ୍ରଙ୍କ ନେତୃତ୍ୱରେ ଜିଲ୍ଲାରେ ଚାଷୀଙ୍କ ଧାନ କ୍ରୟରେ ମଣ୍ଡିରେ ଲାଗି ରହିଥିବା ଅବ୍ୟବସ୍ଥା, ଜନ ବିରୋଧୀ, ଚାଷୀ, ମହିଳା ଓ ଗରିବ ବିରୋଧୀ ବଜେଟକୁ ସମାଲୋଚନା କରି ଜିଲ୍ଲା ଯୁବ କଂଗ୍ରେସର କର୍ମକର୍ତ୍ତାମାନେ ରାଜରାସ୍ତାକୁ ଓହ୍ଲାଇ କେନ୍ଦ୍ର ଓ ରାଜ୍ୟ ସରକାରଙ୍କ ବିରୁଦ୍ଧରେ ନାରାବାଜି କରିବା ସହ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇ ଏକ ଦାବୀପତ୍ର ପ୍ରଦାନ କରିଛନ୍ତି । ଚାଷୀଙ୍କ ହିତକୁ ଦୃଷ୍ଟିରେ ରଖି ଯେପରି ସମସ୍ତ ପଞ୍ଜିକୃତ ଚାଷୀ ସରକାରଙ୍କ ଦ୍ୱାରା ଧାର୍ଯ୍ୟ କରାଯାଇଥିବା ସମୟ ସୀମା ମଧ୍ୟରେ କିପରି ଧାନ ବିକ୍ରି କରିପାରିବେ, ସେଟଲାଇଟ ତ୍ରୁଟି ଦ୍ୱାରା ଧାନ ବିକ୍ରି କରିବାରୁ ବଞ୍ଚିତ ହୋଇଥିବା ଚାଷୀଙ୍କୁ ଧାନ ବିକ୍ରି କରିବାକୁ ସୁଯୋଗ, ଧାନ ବିକ୍ରୟ କରିଥିବା ଚାଷୀଙ୍କ ଟଙ୍କା ଯଥାଶଘ୍ର ତାଙ୍କ ବ୍ୟାଙ୍କ ଆକାଉଣ୍ଟରେ ଜମା କରିବାକୁ ନେଇ ଉପଜିଲ୍ଲାପାଳଙ୍କ ଜରିଆରେ ଜିଲ୍ଲାପାଳଙ୍କୁ ଏକ ଦାବୀପତ୍ର ପ୍ରଦାନ କରିଥିଲେ । ଏଥିସହିତ ଉକ୍ତ ଦାବୀଗୁଡ଼ିକ ଯଥାଶୀଘ୍ର ସମାଧନ ନ ହେଲେ ଅଗାମୀ ଦିନରେ ଏହି ଆନ୍ଦୋଳନକୁ ଆହୁରି ତୀବ୍ରତର କରାଯିବ ବୋଲି ମଧ୍ୟ ଚେତାବନୀ ଦେଇଛନ୍ତି । ଏହି ସମୟରେ ମହଙ୍ଗା ବଜେଟକୁ ନେଇ ପ୍ରଧାନମନ୍ତ୍ରୀ ଓ କେନ୍ଦ୍ର ଅର୍ଥମନ୍ତ୍ରୀଙ୍କ କୁଶ ପୁତ୍ତଳିକା ଦାହ କରାଯାଇଥିଲା । ଅନ୍ୟମାନଙ୍କ ମଧ୍ୟରେ ପାପୋଡ଼ାହାଣ୍ଡି ଜନ-୨ର ଜିଲ୍ଲା ପରିଷଦ ସଭ୍ୟା ଡା. ଲିପିକା ମାଝୀ, ନଗର ଯୁବ କଂଗ୍ରେସ ସଭାପତି ସୁରଜ ଲାଲ, ସାଧାରଣ ସମ୍ପାଦକ ବାବୁଲି ଗଣ୍ଡା, ତ୍ରିଲୋଚନ ବେଶ୍ରା, ଯୁବନେତା ସନ୍ତୋଷ ବେନ୍ୟା, ରାହୁଲ ନାଗ, ନାସିର ହିଆଲ, ମୁନା ଉପାସି, ଜିଲୁ ନାଗ ଓ ଅନେକ ଯୁବ କଂଗ୍ରେସର କର୍ମକର୍ତ୍ତା ଉପସ୍ଥିତ ଥିଲେ ।
