ବିଶ୍ବ ସ୍ବାସ୍ଥ୍ୟ ସଂଗଠନର ଏକ ରିପୋର୍ଟ ଅନୁଯାୟୀ, ଭାରତରେ ୭୭ ନିୟୁତରୁ ଅଧିକ ସାବାଳକ ଟାଇପ୍-୨ ମଧୁମେହରେ ଆକ୍ରାନ୍ତ। ସବୁଠାରୁ ଚିନ୍ତାଜନକ କଥା ହେଲା ୧୨ ବର୍ଷରୁ ୧୮ ବର୍ଷ ବୟସର କିଶୋରଙ୍କୁ ମଧୁମେହ ହେବା ଏବେ ସାଧାରଣ ହୋଇଗଲାଣି। କ୍ରମବର୍ଦ୍ଧିଷ୍ଣୁ ସହରୀକରଣ ଓ ଜୀବନଶୈଳୀରେ ପରିବର୍ତ୍ତନ ଯୋଗୁଁ କମ୍ ଶାରୀରିକ ପରିଶ୍ରମ ସାଙ୍ଗକୁ ପ୍ରକ୍ରିୟାକୃତ ତଥା ଉଚ୍ଚ କ୍ୟାଲୋରିସଂପନ୍ନ ଖାଦ୍ୟ ଗ୍ରହଣ ଯୋଗୁଁ କିଶୋରମାନେ ଏବେ ଅଧିକ ସଂଖ୍ୟାରେ ମଧୁମେହର ଶିକାର ହେଉଛନ୍ତି।
ଆଳସ୍ୟପୂର୍ଣ୍ଣ ଜୀବନଶୈଳୀ, ମାନସିକ ଚାପ ଓ ମେଦବହୁଳତା ବୃଦ୍ଧି ଏହି ଧାରାକୁ ତ୍ବରାନ୍ବିତ କରୁଛି।
ଆମ ଦେଶରେ ପ୍ରାୟ ପ୍ରତି ୪ ଜଣ କିଶୋରଙ୍କ ମଧ୍ୟରୁ ୩ ଜଣ ଶାରୀରିକ ଭାବେ ସକ୍ରିୟ ନୁହନ୍ତି। ଏଥି ସହିତ ସ୍କୁଲ ବୟସର ପିଲାମାନଙ୍କ ମଧ୍ୟରେ ମେଦବହୁଳତା ଯୋଗୁଁ ମଧୁମେହ ଆଶଙ୍କା ବଢ଼ିବାରେ ଲାଗିଛି। ସେହିପରି ଭାରତରେ ୩ ଜଣରୁ ଜଣେ କିଶୋର ଉଚ୍ଚ ରକ୍ତଚାପରେ ପୀଡ଼ିତ। ତେଣୁ ପିଲାମାନଙ୍କର ଜୀବନଶୈଳୀରେ ହସ୍ତକ୍ଷେପ କରି ବ୍ୟାୟାମ ଓ ସୁସ୍ଥ ଭୋଜନକୁ ସେମାନଙ୍କ ଦୈନନ୍ଦିନ ଜୀବନର ଅଂଶ କରିବା ଜରୁରି। ପିଲାମାନଙ୍କ ଠାରେ ବଢ଼ି ଚାଲିଥିବା ମଧୁମେହ ଭାରକୁ ମୁକାବିଲା କରିବାର ମୁଖ୍ୟ ପଦକ୍ଷେପ ହେଉଛି ସଚେତନତା ସୃଷ୍ଟି । ଏକ ସୁସ୍ଥ ଭବିଷ୍ୟତ ପାଇଁ ପିଲାଙ୍କୁ ଶିକ୍ଷା ଦେବାର ସର୍ବୋତ୍କୃଷ୍ଟ ମଞ୍ଚ ହେଉଛି ବିଦ୍ୟାଳୟ। ତେଣୁ ବିଦ୍ୟାଳୟମାନଙ୍କରେ ଏ ଦିଗରେ ସଚେତନତା ସୃଷ୍ଟି ଉପରେ ଗୁରୁତ୍ବାରୋପ କରାଯିବା ଅପରିହାର୍ଯ୍ୟ।
