ଲାଞ୍ଚ ଦେଇ ପୁଲିସ୍ ମାମଲାକୁ ଦବେଇବାକୁ ଚେଷ୍ଟା କରିଥିଲା: ମୃତ ଟ୍ରେନି ଡାକ୍ତରଙ୍କ ବାପା
କୋଲକାତା: ଗତ ମାସରେ କୋଲକାତାର ଆରଜି କର ମେଡିକାଲ୍ରେ ଦୁଷ୍କର୍ମ ଓ ହତ୍ୟା କରାଯାଇଥିବା ଟ୍ରେନି ଡାକ୍ତରଙ୍କ ପରିବାର ସଦସ୍ୟ ବୁଧବାର କହିଛନ୍ତି ଯେ ତାଙ୍କ ଝିଅର ଶରୀରକୁ ଶୀଘ୍ର ଦାହ କରି କୋଲକାତା ପୁଲିସ ଏହି ମାମଲାକୁ ଦାବି ଦେବାକୁ ଚେଷ୍ଟା କରିଥିଲା। ଏଥିପାଇଁ ପୁଲିସ୍ ତାଙ୍କୁ ଲାଞ୍ଚ ଯାଚିଥିଲା ବୋଲି ବି ସେ ଅଭିଯୋଗ ଆଣିଛନ୍ତି।
“ପୁଲିସ ଆରମ୍ଭରୁ ହିଁ ମାମଲାକୁ ହାଲୁକା କରିବାକୁ ଚେଷ୍ଟା କରିଥିଲା। ଶବକୁ ଦେଖିବା ପାଇଁ ଅନୁମତି ଦିଆଯାଇନଥିଲା ଏବଂ ମୃତଦେହ ପରୀକ୍ଷା ପାଇଁ ନିଆଯାଇଥିବା ବେଳେ ପୁଲିସ ଷ୍ଟେସନରେ ଅପେକ୍ଷା କରିବାକୁ ପଡୁଥିଲା’’ ବୋଲି ଅଗଷ୍ଟ ୯ ତାରିଖରେ ଆରଜି କର ହସ୍ପିଟାଲରେ ମୃତ୍ୟୁବରଣ କରିଥିବା ୩୨ ବର୍ଷୀୟା ଟ୍ରେନି ଡାକ୍ତରଙ୍କ ପିତା କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ ପରେ ମୃତଦେହ ଆମକୁ ହସ୍ତାନ୍ତର କରାଯିବା ପରେ ଜଣେ ବରିଷ୍ଠ ପୁଲିସ ଅଧିକାରୀ ଆମକୁ ଟଙ୍କା ପ୍ରଦାନ କରିଥିଲେ ଯାହାକୁ ନେବା ପାଇଁ ଆମେ ତୁରନ୍ତ ମନା କରିଥିଲୁ। ଏହି ମାମଲା ଆପଣ ଜାଣନ୍ତି ଯେ ପ୍ରଥମେ କୋଲକାତା ପୁଲିସ ଦ୍ୱାରା ଅନୁସନ୍ଧାନ କରାଯାଇଥିଲା। କିନ୍ତୁ ପରେ କଲିକତା ହାଇକୋର୍ଟ କେନ୍ଦ୍ରୀୟ ଏଜେନ୍ସିକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେବା ପରେ ସିବିଆଇକୁ ହସ୍ତାନ୍ତର କରାଯାଇଥିଲା।
ଏହି ସମୟ ମଧ୍ୟରେ କୋଲକାତା ଏବଂ ରାଜ୍ୟର ଅନ୍ୟାନ୍ୟ ଅଞ୍ଚଳରେ ବିକ୍ଷୋଭ ପ୍ରଦର୍ଶନ ଜାରି ରହିଥିଲା। ବୁଧବାର ରାତିରେ ହଜାର ହଜାର ମହିଳା ‘ରିକ୍ଲେମ୍ ଦ ନାଇଟ୍’ ଅଭିଯାନର ଏକ ଅଂଶ ଭାବରେ ରାସ୍ତାକୁ ଓହ୍ଲାଇଥିଲେ। ଟ୍ରେନି ଡାକ୍ତରଙ୍କ ପିତାମାତା ମଧ୍ୟ ସେମାନଙ୍କ ଝିଅ ପାଇଁ ଲଢୁଥିବା ଜୁନିୟର ଡାକ୍ତରମାନଙ୍କୁ ସମର୍ଥନ କରିବାକୁ ଏହି ବିକ୍ଷୋଭରେ ଯୋଗ ଦେଇଥିଲେ। ଏହି ବିକ୍ଷୋଭ ଜାରି ରହିଥିବା ବେଳେ ପଶ୍ଚିମବଙ୍ଗ ବିଧାନସଭା ମଙ୍ଗଳବାର ସର୍ବସମ୍ମତି କ୍ରମେ ଦୁଷ୍କର୍ମ ବିରୋଧୀ ‘ଅପରାଜିତା’ ବିଲ୍ ପାରିତ କରିଛି।
