ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଇରାନ ସମର୍ଥିତ ମିଲିସିଆ ଆତଙ୍କୀ ଆକ୍ରମଣର ଦୃଢ ଜବାବ ଦେଇଛି ଆମେରିକା। ସୋମବାର ସିରିଆର ଦୁଇଟି ସ୍ଥାନରେ ଘନ ଘନ ମିଶାଇଲ ମାଡ଼ କରିଛି ଆମେରିକା। ଏନେଇ ସୂଚନା ଦେଇଛି ଆମେରିକାର ସେଣ୍ଟ୍ରାଲ କମାଣ୍ଡ। ଆକ୍ରମଣ ପରେ ଆମେରିକାର ସେନା କହିଛି ଯେ ଏହି ଆକ୍ରମଣ ପରେ ଇରାନ ସମର୍ଥିତ ଗୋଷ୍ଠୀ ଭବିଷ୍ୟତରେ ଆମେରିକା ଏବଂ ଏହାର କର୍ମଚାରୀଙ୍କ ଉପରେ ଆକ୍ରମଣ ଯୋଜନା କରିବାକୁ ଅନେକ ଥର ଭାବିବ।
ଏହି ଆକ୍ରମଣରେ କୌଣସି ଆମେରିକୀୟ ସେନା ଆହତ ହୋଇନାହାଁନ୍ତି। ସୋମବାର ବିଳମ୍ବିତ ରାତି ପର୍ଯ୍ୟନ୍ତ ପେଣ୍ଟାଗନ୍ ସିରିଆର କେଉଁ ଠିକଣା ଉପରେ ଆକ୍ରମଣ କରିଥିଲା ସେ ବିଷୟରେ ସୂଚନା ଦେଇନାହିଁ କିମ୍ବା ପ୍ରତିବଦଳରେ ଆମେରିକା କେଉଁ ସ୍ଥାନ ଉପରେ ଆକ୍ରମଣ କରିଛି ତାହା ମଧ୍ୟ କହିନାହିଁ।
ଆମେରିକା ଉଭୟ ଇରାକ ଏବଂ ସିରିଆରେ ଇରାନ ସହ ଜଡିତ ଟାର୍ଗେଟ ଉପରେ ଆକ୍ରମଣ ଜାରି ରଖିଛି। ଫେବୃଆରୀରେ, ଇରାନର ରିଭୋଲ୍ୟୁସନାରୀ ଗାର୍ଡ (ଆଇଆରଜିସି) ଏବଂ ଇରାକ-ସିରିଆର ସମର୍ଥିତ ମିଲିସିଆଙ୍କ ୮୫ରୁ ଅଧିକ ମିଶାଇଲ ମାଡ଼ କରିଥିଲା ଆମେରିକା।
ଇସଲାମିକ୍ ଷ୍ଟେଟ୍ ଆତଙ୍କବାଦୀଙ୍କ ବିରୋଧୀ କାର୍ଯ୍ୟକଳାପରେ ସେନାକୁ ସାହାଯ୍ୟ କରିବା ପାଇଁ ସିରିଆରେ ପ୍ରାୟ ୯୦୦ ଆମେରିକୀୟ ସୈନ୍ୟ ନିୟୋଜିତ ହୋଇଛନ୍ତି। ଫେବୃଆରୀରେ ଏହା ସିରିଆରେ ଇରାନ ସମର୍ଥିତ ମିଲିସିଆ ଟାର୍ଗେଟ ଉପରେ ଏକ ବଡ଼ ଆକ୍ରମଣ କରିଥିଲା।
