କୁଏତ ସିଟି: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଦୁଇ ଦିନିଆ ଗସ୍ତରେ ଆସି କୁଏତ ପହଞ୍ଚିବା ପରେ ତାଙ୍କୁ ଭବ୍ୟ ସମ୍ବର୍ଦ୍ଧନା ଦିଆଯାଇଛି। ପ୍ରଧାନମନ୍ତ୍ରୀଙ୍କୁ ଭାରତୀୟ ସମୁଦାୟ ଜୋରଦାର ସ୍ବାଗତ କରିଥିବା ବେଳେ କୁଏତ ନେତୃତ୍ୱ ପ୍ରଧାନମନ୍ତ୍ରୀଙ୍କ ଗସ୍ତକୁ ‘ଐତିହାସିକ’ ଦର୍ଶାଇଛି । ଗତ ୪୩ ବର୍ଷ ମଧ୍ୟରେ କୌଣସି ଭାରତୀୟ ପ୍ରଧାନମନ୍ତ୍ରୀଙ୍କ ଏହା ପ୍ରଥମ କୁଏତ ଗସ୍ତ। ଶେଷ ଭାରତୀୟ ପ୍ରଧାନମନ୍ତ୍ରୀ ଭାବେ ୧୯୮୧ରେ ଇନ୍ଦିରା ଗାନ୍ଧୀ କୁଏତ ଗସ୍ତ କରିଥିଲେ। ଏହି ଗସ୍ତ ଅବସରରେ ପ୍ରଧାନମନ୍ତ୍ରୀ ମୋଦୀ ରାମାୟଣ ଓ ମହାଭାରତର ଦୁଇ ଆରବୀ ଭାଷାର ଅନୁବାଦକ ଅବଦୁଲ୍ଲା ଅଲ୍ ବରୋନ ଏବଂ ଅବଦୁଲ ଲତିଫ୍ ଅଲ୍ ନେସେଫଙ୍କୁ ଭେଟିଥିଲେ। ପ୍ରଧାନମନ୍ତ୍ରୀ ତାଙ୍କ ମାସିକ ରେଡିଓ ଉଦ୍ବୋଧନ ‘ମନ୍ କୀ ବାତ୍’ରେ ମଧ୍ୟ ଏହି ଦୁଇ ଅନୁବାଦକଙ୍କ ସଂପର୍କରେ ପୂର୍ବରୁ ଉଲ୍ଲେଖ କରିଛନ୍ତି। କୁଏତରେ ରହୁଥିବା ୧୦୧ ବର୍ଷୀୟ ଅବସରପ୍ରାପ୍ତ ଭାରତୀୟ ବୈଦେଶିକ ସେବା (ଆଇଏଫଏସ) ଅଧିକାରୀ ମଙ୍ଗଲ ସାଇଁ ହାଣ୍ଡାଙ୍କୁ ମଧ୍ୟ ପ୍ରଧାନମନ୍ତ୍ରୀ ଭେଟିଥିଲେ। ଅବସରପ୍ରାପ୍ତ ଅଧିକାରୀ ସୋସିଆଲ ମିଡିଆରେ ଅନୁରୋଧ କରିଥିଲେ ଯେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବାକୁ ଚାହୁଛନ୍ତି।
ପ୍ରଧାନମନ୍ତ୍ରୀ କହିଛନ୍ତି, କୁଏତର ଶୀର୍ଷ ନେତୃତ୍ୱଙ୍କ ସହ ତାଙ୍କର ଆଲୋଚନା ଭାରତ ଏବଂ କୁଏତ ମଧ୍ୟରେ ଭବିଷ୍ୟତ ଭାଗିଦାରୀ ପାଇଁ ଏକ ରୋଡମ୍ୟାପ୍ ପ୍ରସ୍ତୁତ କରିବାର ବଡ଼ ସୁଯୋଗ ଆଣିବ। ଆମେ କୁଏତ ସହିତ ଐତିହାସିକ ସମ୍ପର୍କକୁ ଗଭୀର ଭାବରେ ଗୁରୁତ୍ୱ ଦେଉଛୁ ଯାହା ପିଢ଼ି ପିଢ଼ି ଧରି ବଜାୟ ରହିଛି । ଆମେ କେବଳ ଦୃଢ଼ ବାଣିଜ୍ୟ ଅଂଶୀଦାର ନୁହଁ ବରଂ ପଶ୍ଚିମ ଏସିଆ କ୍ଷେତ୍ରରେ ଶାନ୍ତି, ନିରାପତ୍ତା, ସ୍ଥିରତା ଏବଂ ସମୃଦ୍ଧି ପାଇଁ ମଧ୍ୟ ଆମର ମିଳିତ ଆଗ୍ରହ ରହିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଅମୀର, କ୍ରାଉନ୍ ପ୍ରିନ୍ସ ଏବଂ କୁଏତ୍ ପ୍ରଧାନମନ୍ତ୍ରୀଙ୍କ ସହ ତାଙ୍କର ସାକ୍ଷାତକୁ ନେଇ ସେ ଉତ୍ସାହିତ ଅଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି। କୁଏତରେ ଆୟୋଜିତ ୨୬ତମ ଆରବ ଉପସାଗରୀୟ କପ୍ ଉଦଘାଟନୀ ସମାରୋହରେ ମଧ୍ୟ ପ୍ରଧାନମନ୍ତ୍ରୀ ଯୋଗଦେବେ। ଭାରତ କୁଏତର ଶୀର୍ଷ ବାଣିଜ୍ୟ ସହଯୋଗୀମାନଙ୍କ ମଧ୍ୟରୁ ଅନ୍ୟତମ। ଭାରତୀୟ ସମ୍ପ୍ରଦାୟ କୁଏତର ସବୁଠାରୁ ବଡ଼ ପ୍ରବାସୀ ସମ୍ପ୍ରଦାୟ । କୁଏତର ମୋଟ ଜନସଂଖ୍ୟାର ୨୧ ପ୍ରତିଶତ (୧ ନିୟୁତ) ହେଉଛନ୍ତି ଭାରତୀୟ ଏବଂ ଏହାର କାର୍ଯ୍ୟଶକ୍ତିର ୩୦ ପ୍ରତିଶତ (ପାଖାପାଖି ୯ ଲକ୍ଷ) ଅଟନ୍ତି । କୁଏତସ୍ଥିତ ଭାରତୀୟ ଦୂତାବାସ ଅନୁଯାୟୀ ଘରୋଇ କ୍ଷେତ୍ର ତଥା ଘରୋଇ କ୍ଷେତ୍ରର କର୍ମଚାରୀ ତାଲିକାରେ ଭାରତୀୟମାନେ ଶୀର୍ଷରେ ରହିଛନ୍ତି।୨୦୨୩-୨୪ ଆର୍ଥିକ ବର୍ଷରେ କୁଏତ ଓ ଭାରତର ଦ୍ୱିପାକ୍ଷିକ ବାଣିଜ୍ୟ ମୂଲ୍ୟ ୧୦.୪୭ ବିଲିୟନ ଡଲାର ଥିଲା। କୁଏତ ହେଉଛି ଭାରତର ଷଷ୍ଠ ବୃହତ୍ତମ ଅଶୋଧିତ ତୈଳ ଯୋଗାଣକାରୀ, ଯାହା ଦେଶର ଶକ୍ତି ଆବଶ୍ୟକତାର ୩ ପ୍ରତିଶତ ପୂରଣ କରିଥାଏ।
