ନୂଆଦିଲ୍ଲୀ: ଏକାଧିକ ନକଲି ଭୋଟର ପରିଚୟପତ୍ର ପ୍ରଦାନ ଏବଂ ସୀମା ନିର୍ଦ୍ଧାରଣର ପ୍ରଭାବ ସମ୍ପର୍କରେ ଆଲୋଚନା ପାଇଁ ଦାବି ଗ୍ରହଣୀୟ ନ ହେବାରୁ ରାଜ୍ୟସଭାରେ କଂଗ୍ରେସ ଓ ତୃଣମୂଳ କଂଗ୍ରେସ ସମେତ ବିରୋଧୀ ଦଳ ନେତାମାନେ ସୋମବାର କକ୍ଷତ୍ୟାଗ କରିଛନ୍ତି। ତୃଣମୂଳ କଂଗ୍ରେସ, କଂଗ୍ରେସ ଓ ବାମପନ୍ଥୀ ଦଳର ସାଂସଦମାନେ ନିୟମ ୨୬୭ ଅନୁଯାୟୀ ନୋଟିସ୍ ଦେଇ ସେମାନଙ୍କ ମାଧ୍ୟମରେ ଉଠାଯାଉଥିବା ପ୍ରସଙ୍ଗରେ ଆଲୋଚନା ପାଇଁ ଜିଦ୍ ଧରିଥିଲେ। କିନ୍ତୁ ଉପାଧ୍ୟକ୍ଷ ହରିବଂଶ ସେମାନଙ୍କ ଦାବିକୁ ଗ୍ରହଣ କରି ନ ଥିଲେ।
ଟିଏମ୍ସି ଓ କଂଗ୍ରେସ ସାଂସଦମାନେ ନକଲି ଭୋଟର ପରିଚୟପତ୍ର ପ୍ରସଙ୍ଗ ଉଠାଇବାକୁ ଚାହୁଥିବା ବେଳେ ତାମିଲନାଡ଼ୁର ଦଳମାନେ ଦକ୍ଷିଣ ରାଜ୍ୟଗୁଡ଼ିକ ଉପରେ ସୀମା ନିର୍ଦ୍ଧାରଣ ପ୍ରକ୍ରିୟାର ପ୍ରଭାବ ବିଷୟରେ ଆଲୋଚନା କରିବାକୁ ଚାହୁଥିଲେ। ବିରୋଧୀ ସାଂସଦମାନେ ନାରାବାଜି କରିବା ସହ ଆଲୋଚନା ପାଇଁ ଚାପ ପକାଇଥିଲେ। ତେବେ ସେମାନଙ୍କ ନୋଟିସ୍ ଗ୍ରହଣ କରାଯାଇନାହିଁ ବୋଲି ହରିବଂଶ କହିବା ପରେ ସେମାନେ କକ୍ଷତ୍ୟାଗ କରିଥିଲେ। ହରିବଂଶ କହିଛନ୍ତି ଯେ, ଟିଏମ୍ସିର ସୁଖେନ୍ଦୁ ଶେଖର ରାୟ, ମୌସମ ବି ନୂ, ସୁସ୍ମିତା ଦେବ ଓ କଂଗ୍ରେସର ପ୍ରମୋଦ ତିୱାରୀ ରାଜ୍ୟରେ ଏକାଧିକ ନକଲି ଫଟୋ ପରିଚୟପତ୍ର ଜାରି କରିବାରେ ନିର୍ବାଚନ କମିସନଙ୍କ ତ୍ରୁଟିକୁ ନେଇ ଆଲୋଚନା କରିବାକୁ ଦାବି କରିଥିଲେ। ଦ୍ରାବିଡ଼ ମୁନେତ୍ର କଜଗମ(ଡିଏମ୍କେ)ର ପି ୱିଲସନ ଓ ଭି ଶିବଦାସନ ଦକ୍ଷିଣ ରାଜ୍ୟଗୁଡ଼ିକରେ ହେବାକୁ ଥିବା ସୀମା ନିର୍ଦ୍ଧାରଣ ପ୍ରକ୍ରିୟାକୁ ନେଇ ଚିନ୍ତା ପ୍ରକଟ କରିଥିଲେ। ଭାରତୀୟ ଜନତା ପାର୍ଟିର ସମିକ ଭଟ୍ଟାଚାର୍ଯ୍ୟ ପଶ୍ଚିମବଙ୍ଗରେ ଅନୁସୂଚିତ ଜାତି, ଜନଜାତି ଓ ଓବିସିଙ୍କ ଉପରେ ବଢୁଥିବା ଅତ୍ୟାଚାର ପ୍ରସଙ୍ଗରେ ଆଲୋଚନା କରିବାକୁ ଚାହୁଥିଲେ।
ଭାରତରେ ସାଟେଲାଇଟ୍ ବ୍ରଡବ୍ୟାଣ୍ଡ ଇଣ୍ଟରନେଟ୍ ଯୋଗାଇବା ପାଇଁ ଭାରତୀ ଏୟାରଟେଲ୍ ଓ ରିଲାଏନ୍ସ ଜିଓ ଏଲନ୍ ମସ୍କଙ୍କ ଷ୍ଟାରଲିଙ୍କ୍ ସହ ହୋଇଥିବା ଚୁକ୍ତିର ପ୍ରଭାବ ପ୍ରସଙ୍ଗ ଉଠାଇବାକୁ ଭାରତୀୟ କମ୍ୟୁନିଷ୍ଟ ପାର୍ଟିର ପି ସନ୍ତୋଷ କୁମାର ଚେଷ୍ଟା କରିଥିଲେ। ଆମ୍ ଆଦମୀ ପାର୍ଟିର ସଞ୍ଜୟ ସିଂହ ଦିଲ୍ଲୀରେ ଅପରାଧ ବୃଦ୍ଧି ଓ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ଉପରେ ଆଲୋଚନା କରିବାକୁ ଦାବି କରିଥିବା ବେଳେ ଇଣ୍ଡିଆନ୍ ୟୁନିୟନ ମୁସଲିମ୍ ଲିଗ୍ର ହାରିସ୍ ବିରାନ୍ କେରଳରେ ଯୁବକ ଓ ଛାତ୍ରଛାତ୍ରୀଙ୍କ ମଧ୍ୟରେ ନିଶା ଅଭ୍ୟାସ ବୃଦ୍ଧି ପ୍ରସଙ୍ଗରେ ଆଲୋଚନା କରିବାକୁ ଚାହୁଥିଲେ।
