ପାକିସ୍ତାନ ପାଲଟିଛି ଭିକାରୀଙ୍କ କାରଖାନା!: ୫ ହଜାର ଭିକାରୀଙ୍କୁ ଦେଶରୁ ବାହାର କଲା ସାଉଦି
ଦୁବାଇ: ପାକିସ୍ତାନ ପୁଣି ଥରେ ଅନ୍ତର୍ଜାତୀୟସ୍ତରରେ ଅପମାନିତ ହୋଇଛି ଏବଂ ଏହି ଅପମାନ ପାଇଁ ଦାୟୀ ହେଉଛନ୍ତି ପାକିସ୍ତାନୀ ନାଗରିକ। ସମୟ ସମୟରେ ପାକିସ୍ତାନ ସରକାର ଆଇଏମଏଫ ଏବଂ ଆରବ ଦେଶମାନଙ୍କ ପାଖକୁ ସାହାଯ୍ୟ ପାଇଁ ଯାଇଥାନ୍ତି। କେବଳ ସରକାର ନୁହେଁ ବରଂ ପାକିସ୍ତାନର ଲୋକମାନେ ମଧ୍ୟ ହାତରେ ପାତ୍ର ଧରି ବିଦେଶରେ ଭିକ୍ଷା ମାଗିବାର ଏକ ବ୍ୟବସାୟ କରିଛନ୍ତି। ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖୱାଜା ମହମ୍ମଦ ଆସିଫ କହିଛନ୍ତି ଯେ, ସାଉଦି ଆରବ ୪,୭୦୦ ରୁ ଅଧିକ ପାକିସ୍ତାନୀ ଭିକାରୀଙ୍କୁ ଗିରଫ କରି ଦେଶାନ୍ତର କରିଛି।
ଏହି ପାକିସ୍ତାନୀ ଲୋକମାନେ ବିଭିନ୍ନ ଭିସା ପରମିଟ୍ ନେଇ ସାଉଦି ଆରବ ଯାଇଥିଲେ, କିନ୍ତୁ ଏଠାରେ କାମ କରିବା ପରିବର୍ତ୍ତେ ସେମାନେ ଭିକ୍ଷା ମାଗିବା ଆରମ୍ଭ କରିଥିଲେ। ଦିନକୁ ଦିନ ଭିକାରୀଙ୍କ ସଂଖ୍ୟା ବୃଦ୍ଧି ପାଉଥିବାରୁ ସାଉଦି ପୁଲିସର ଦୃଷ୍ଟି ଆକର୍ଷଣ ହୋଇଥିଲା ଏବଂ ପରେ ଆରମ୍ଭ ହୋଇଥିବା ଅଭିଯାନରେ ପ୍ରାୟ ୫ ହଜାର ଭିକାରୀଙ୍କୁ ଧରାଯାଇଥିଲା।
ପାକିସ୍ତାନୀ ଖବରକାଗଜ ଡନରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ଖୱାଜା ଆସିଫ ଏହା ମଧ୍ୟ କହିଛନ୍ତି ଯେ ପାକିସ୍ତାନରେ ପ୍ରାୟ ୨ କୋଟି ୨୦ ଲକ୍ଷ ଭିକାରୀ ଅଛନ୍ତି, ଯେଉଁମାନେ ପ୍ରତିବର୍ଷ ୪୨ ବିଲିୟନ ଟଙ୍କା ଦାନ ସଂଗ୍ରହ କରନ୍ତି। ତଥାପି, ବିଦେଶରେ ଭିକାରୀଙ୍କ ସଂଖ୍ୟା ବୃଦ୍ଧି ପାଉଥିବାରୁ ପାକିସ୍ତାନର ଛବି ଖରାପ ହେଉଛି।
ଆସିଫ୍ କହିଛନ୍ତି ଯେ, ସରକାର ପାକିସ୍ତାନର ଅର୍ଥନୀତିକୁ ଉନ୍ନତ କରିବା ପାଇଁ ପଦକ୍ଷେପ ନେଉଛନ୍ତି। ସରକାର ୨୦୩୫ ସୁଦ୍ଧା ପାକିସ୍ତାନକୁ ୧୦୦ ବିଲିୟନ ଡଲାରର ରପ୍ତାନି ଅର୍ଥନୀତି ଭାବରେ ପ୍ରତିଷ୍ଠା କରିବାକୁ ଲକ୍ଷ୍ୟ ରଖିଛନ୍ତି।
ଅଧିକ ପଢ଼ନ୍ତୁ: ଏପ୍ରିଲ ୨୪-୨୫ ସୁଦ୍ଧା ପଶ୍ଚିମ ଓଡ଼ିଶା ତାପମାତ୍ରା ୪୫ ଡିଗ୍ରି ଛୁଇଁବା ସମ୍ଭାବନା: ଆଇଏମଡି
ଅନ୍ୟ ଦେଶରେ ଭିକ୍ଷା ମାଗୁଥିବା ନାଗରିକମାନେ ପାକିସ୍ତାନ ସରକାରଙ୍କ ପାଇଁ ଏକ ବଡ଼ ସମସ୍ୟା ହୋଇପଡୁଛନ୍ତି। ବିଶ୍ୱ ସ୍ତରରେ ଦେଶର ପ୍ରତିଛବି ନଷ୍ଟ ହେଉଛି, ଯାହାକୁ ହ୍ରାସ କରିବା ପାଇଁ ପାକିସ୍ତାନ ସରକାର ଗତ କିଛି ମାସ ମଧ୍ୟରେ ବିଦେଶରେ ଭିକାରୀ ହୋଇଥିବା ହଜାର ହଜାର ଲୋକଙ୍କ ପାସପୋର୍ଟକୁ ସ୍ଥଗିତ ରଖିଛନ୍ତି।
ବିଶେଷ କଥା ହେଉଛି ଆରବ ଦେଶଗୁଡ଼ିକରେ ଧରାପଡ଼ିଥିବା ଅଧିକାଂଶ ଭିକାରୀ ପାକିସ୍ତାନୀ ବଂଶୋଦ୍ଭବ। ଫଳସ୍ୱରୂପ, ସାଉଦି ଆରବ ଦେଶଗୁଡ଼ିକ ଭିକାରୀଙ୍କ ଆଗମନକୁ ରୋକିବା ପାଇଁ ପଦକ୍ଷେପ ନେବାକୁ ପାକିସ୍ତାନ ସରକାରଙ୍କୁ ଅନୁରୋଧ କରିଛନ୍ତି।
