ବାଂଲା ସେନାମୁଖ୍ୟଙ୍କ ବିରୋଧରେ ଷଡ୍ଯନ୍ତ୍ର ଅଭିଯୋଗ: ଉପମୁଖ୍ୟଙ୍କ ଉପରେ ନଜର ରଖିବାକୁ ନିର୍ଦ୍ଦେଶ
ଢାକା: ପାକିସ୍ତାନ ସହ ଘନିଷ୍ଠ ସମ୍ପର୍କ ରଖିଥିବା ଜଣେ ବରିଷ୍ଠ ବାଂଲାଦେଶୀ ସାମରିକ ଅଧିକାରୀଙ୍କ ଉପରେ ସେନାରେ ବିଦ୍ରୋହ ଲାଗି ଷଡ଼୍ଯନ୍ତ୍ର କରିବା ଅଭିଯୋଗରେ ନଜରରେ ରଖାଯାଇଛି। କ୍ୱାର୍ଟର ମାଷ୍ଟର ଜେନେରାଲ (କ୍ୟୁଏମ୍ଜି) ଲେଫ୍ଟନାଣ୍ଟ ଜେନେରାଲ ଫୈଜୁର ରେହମାନ ଷଡ଼୍ଯନ୍ତ୍ର କରୁଥିବା ନେଇ ସୁରାକ ପାଇବା ପରେ ସେନା ମୁଖ୍ୟ ୱାକର-ଉଜ୍-ଜମାନ ଏହି ନିର୍ଦ୍ଦେଶ ଦେଇଛନ୍ତି। ଜମାତର ଜଣେ ଜଣାଶୁଣା ସମର୍ଥକ ଲେଫ୍ଟନାଣ୍ଟ ଜେନେରାଲ ଫୈଜୁର ରେହମାନ୍ ସେନାମୁଖ୍ୟଙ୍କ ଅଜାଣତରେ ଏକ ବୈଠକ ଡାକିବା ସମ୍ପର୍କରେ ସୂଚନା ମିଳିବା ପରେ ଏହି ପଦକ୍ଷେପ ନିଆଯାଇଛି। ସୂତ୍ରରୁ ପ୍ରକାଶ ଯେ ବାଂଲାଦେଶ ସେନାର କାର୍ଯ୍ୟକାରୀ ମୁଖ୍ୟଙ୍କ ବିରୋଧରେ ସମର୍ଥନ ସଂଗ୍ରହ କରିବା ପାଇଁ ରେହମାନଙ୍କ ଦ୍ବାରା ଡିଭିଜନାଲ କମାଣ୍ଡରଙ୍କ ସହ ଏହି ବୈଠକ ଡକାଯାଇଥିଲା। ଲେଫ୍ଟନାଣ୍ଟ ଜେନେରାଲ ଫୈଜୁର ରେହମାନ ମାର୍ଚ୍ଚ ପ୍ରଥମ ସପ୍ତାହରେ ପ୍ରମୁଖ ଡିଭିଜନାଲ କମାଣ୍ଡର (ଜିଓସି)ଙ୍କ ବୈଠକ ଡାକିଥିଲେ। ତେବେ ସେନାମୁଖ୍ୟଙ୍କ ସଚିବାଳୟ ବୈଠକ ସମ୍ପର୍କରେ ଜାଣିବା ପରେ ବରିଷ୍ଠ ଅଧିକାରୀଙ୍କୁ ଚେତାବନୀ ଦିଆଯାଇଥିଲା। ଏହାପରେ ବରିଷ୍ଠ ଅଧିକାରୀମାନେ ଗୁରୁତ୍ୱପୂର୍ଣ୍ଣ ବୈଠକରୁ ଓହରି ଯାଇଥିଲେ।
୨୦୨୫ର ପ୍ରଥମ ଦୁଇ ମାସରେ ଲେଫ୍ଟନାଣ୍ଟ ଜେନେରାଲ ଫୈଜୁର ରେହମାନ ଜମାତ ନେତା ଓ ପାକିସ୍ତାନୀ କୂଟନୀତିଜ୍ଞଙ୍କ ସହ ଅନେକ ବୈଠକ କରିଥିଲେ। ବାଂଲାଦେଶ ସେନା ମୁଖ୍ୟଙ୍କୁ ଏହି ବୈଠକ ସମ୍ପର୍କରେ ଅବଗତ କରାଯିବା ପରେ ସେ ସତର୍କ ହୋଇ ତାଙ୍କୁ ନଜରରେ ରଖିଥିଲେ। ଗତ କିଛିମାସ ଧରି ହିଂସା, ଭଙ୍ଗାରୁଜା ଓ ଦଙ୍ଗା ବୃଦ୍ଧି ପାଉଥିବା ବେଳେ ବାଂଲାଦେଶରେ ପୁଣି ଥରେ ଅଶାନ୍ତି ଦେଖାଦେଇଛି। ନିକଟରେ ହୋଇଥିବା ବିକ୍ଷୋଭରେ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ପରିବାର ସହ ଜଡ଼ିତ ସମ୍ପତ୍ତି ଭଙ୍ଗାରୁଜା ହୋଇଥିବା ଦେଖିବାକୁ ମିଳିଛି, ଯେଉଁଥିରେ ତାଙ୍କ ପିତା ଶେଖ୍ ମୁଜିବୁର୍ ରେହମାନଙ୍କ ଢାକା ବାସଭବନ ମଧ୍ୟ ରହିଛି।
