ଲକ୍ଷ୍ନୌ: ଉତ୍ତରପ୍ରଦେଶର ଲକ୍ଷ୍ନୌରେ ଛାତ୍ର ଅନୁପ ପଟେଲଙ୍କୁ ଅପହରଣ କରାଯାଇଥିବା କାହାଣୀ ମିଥ୍ୟା ପ୍ରମାଣିତ ହୋଇଛି। ଅନୁପ ପଟେଲ ପରୀକ୍ଷା ଦେବାକୁ କୁଶୀନଗରରୁ ଆସିଥିଲେ। ତା’ପରେ ପରିବାର ସଦସ୍ୟ ଜାଣିବାକୁ ପାଇଲେ ଯେ, ତାଙ୍କୁ ଅପହରଣ କରାଯାଇଛି।
ଏହି ମାମଲା ପୁଲିସ ପାଖରେ ପହଞ୍ଚିଥିଲା। ଯେତେବେଳେ ପୁଲିସ ଅନୁସନ୍ଧାନ କଲା, ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଲା। ବାସ୍ତବରେ ଅନୁପ ପଟେଲ ମିଛ କହିଥିଲେ। ତେବେ ପୁଲିସର ପଚରାଉଚରା ବେଳେ ଅନୁପ ମଧ୍ୟ ଏହାର କାରଣ ପ୍ରକାଶ କରିଥିଲେ।
ଅନୁପ ପଟେଲ ପୁଲିସକୁ କହିଥିଲେ, ଲକ୍ଷ୍ନୌରେ ପହଞ୍ଚିବା ପରେ ସେ ନିଜେ ଅପହରଣର ଏକ ମିଥ୍ୟା କାହାଣୀ ସୃଷ୍ଟି କରିଥିଲେ। ସେ ଭାଇକୁ ମେସେଜ କରି ତାଙ୍କୁ ଅପହରଣ କରାଯାଇଥିବା କହିଥିଲେ। ସେ ତାଙ୍କ ଭାଇଙ୍କୁ କହିଥିଲେ ଯେ, ଅପରାଧୀଙ୍କଠାରୁ ରକ୍ଷା ପାଇବା ପରେ ସେ କୌଣସି ପ୍ରକାରେ ଶୌଚାଳୟକୁ ଆସି ମେସେଜ କରୁଛନ୍ତି। ଏହା ପରେ ସେ ମୋବାଇଲ୍ ବନ୍ଦ କରିଦେଇଥିଲେ।
ଅନୁପ ପୁଲିସକୁ କହିଥିଲେ, ସେ ଜାଣିବାକୁ ଚାହୁଁଥିଲେ କିଏ ତାଙ୍କୁ ଅଧିକ ଭଲ ପାଉଛନ୍ତି, ତାଙ୍କ ପରିବାର ଅବା ତାଙ୍କ ଗର୍ଲଫ୍ରେଣ୍ଡ? ଏହା ଜାଣିବା ପାଇଁ ସେ ତାଙ୍କ ଅପହରଣର ଏକ ମିଥ୍ୟା କାହାଣୀ ସୃଷ୍ଟି କରିଥିଲେ।
ଡିସିପି ପୂର୍ବ ଶଶାଙ୍କ ସିଂ କହିଛନ୍ତି, କୁଶୀନଗରର ପଡରୌନା ହରପୁର ଭେଡିହାରି ନିବାସୀ ଅନୁପ ପଟେଲ ଶୁକ୍ରବାର ଦିନ ରେଲୱେ ପରୀକ୍ଷା ଦେବା ପାଇଁ ଟ୍ରେନ ଯୋଗେ ଲକ୍ଷ୍ନୌକୁ ଆସିଥିଲେ। ସେ ଗୋମତି ନଗର ରେଳ ଷ୍ଟେସନରେ ଓହ୍ଲାଇ ଡୁବାଗା କେନ୍ଦ୍ରକୁ ଯାଇଥିଲେ।
ଏହି ସମୟରେ ସେ ନୋଏଡା ଜେୱର ବିମାନବନ୍ଦରରେ କାର୍ଯ୍ୟ କରୁଥିବା ତାଙ୍କ ଭାଇ ରାଜୁ ପଟେଲଙ୍କୁ ମେସେଜ କରିଥିଲେ ଯେ ଅଟୋରେ ଯାତ୍ରା କରୁଥିବା କିଛି ଲୋକ ତାଙ୍କୁ ଅପହରଣ କରି ନେଇଛନ୍ତି। ଏହା ପରେ ତାଙ୍କ ମୋବାଇଲ୍ ବନ୍ଦ ହୋଇଯାଇଥିଲା।
ଅଧିକ ପଢ଼ନ୍ତୁ: ଆସାମରେ ବାଲ୍ୟ ବିବାହ ବିରୋଧୀ ତୃତୀୟ ପର୍ଯ୍ୟାୟ ପଦକ୍ଷେପ: ୩୩୫ ମାମଲାରେ ୪୧୬ ଗିରଫ ରାଜୁ ଏନେଇ ତୁରନ୍ତ ଲକ୍ଷ୍ନୌ ପୁଲିସକୁ ସୂଚନା ଦେଇଥିଲେ। ଡିସିପି କହିଛନ୍ତି ଯେ ଯେତେବେଳେ ପୁଲିସ୍ ଟିମ୍ ରେଳ ଷ୍ଟେସନରେ ଏବଂ ଏହାର ଆଖପାଖରେ ସ୍ଥାପିତ ସିସିଟିଭି କ୍ୟାମେରାର ଫୁଟେଜ୍ ଯାଞ୍ଚ୍ କରିଥିଲା, ସେତେବେଳେ ଅନୁପ ଷ୍ଟେସନରେ ଆରାମରେ ଯାଉଥିବାର ଦେଖାଯାଇଥିଲା। ସେ ପରୀକ୍ଷା ଦେବାକୁ ଆସିଥିଲେ ବୋଲି ପରୀକ୍ଷା କେନ୍ଦ୍ରରେ ସୂଚନା ମିଳିଥିଲା। ଯେତେବେଳେ ପୁଲିସ ତାଙ୍କୁ ଖୋଜିବା ଆରମ୍ଭ କଲା, ଚିନହଟର ଆୱଧ ବସ୍ ଷ୍ଟାଣ୍ଡରେ ତାଙ୍କ ମୋବାଇଲ୍ର ଲୋକେସନ ମିଳିଥିଲା, ତା’ପରେ ପୁଲିସ ତାଙ୍କୁ ଧରିଥିଲା।
