ମୁମ୍ବାଇ: ଏନଡିଏଠାରୁ ଅଲଗା ହେଲା ପବନ କଲ୍ୟାଣଙ୍କ ଜନସେନା ପାର୍ଟି। ଅଭିନେତାରୁ ରାଜନେତା ପାଲଟିଥିବା ସାଉଥ ସୁପରଷ୍ଟାର ପବନ କଲ୍ୟାଣଙ୍କ ଜନସେନା ପାର୍ଟି ଏବେ ଏନଡିଏଠାରୁ ନିଜକୁ ଅଲଗା କରିଛି। ଅଭିନେତା ଗୁରୁବାର ଏହି ଘୋଷଣା କରିଛନ୍ତି। ଏନଡିଏଠାରୁ ଅଲଗା ହେବା ପରେ ସେ ଚନ୍ଦ୍ରବାବୁ ନାଇଡୁଙ୍କ ଦଳ ତେଲୁଗୁ ଦେଶମ ପାର୍ଟିକୁ ସମର୍ଥନ କରିଛନ୍ତି।
କିଛି ଦିନ ତଳେ ପବନ କଲ୍ୟାଣ ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଏନ.ଚନ୍ଦ୍ରବାବୁ ନାଇଡୁଙ୍କ ଦଳ ତେଲୁଗୁ ଦେଶମ ପାର୍ଟି ସହିତ ମେଣ୍ଟ କରି ତାଙ୍କ ଗିରଫଦାରୀକୁ ବିରୋଧ କରିଥିଲେ। ସେବେଠାରୁ ଚର୍ଚ୍ଚା ହେଉଥିଲା ଯେ ସେ ବିଜେପିଠାରୁ ଅଲଗା ହୋଇପାରନ୍ତି।
ଉଲ୍ଲେଖଯୋଗ୍ୟ, ପବନ କଲ୍ୟାଣଙ୍କ ଜନସେନା ପାର୍ଟି ଜାନୁଆରି ୨୦୨୦ରେ ଭାରତୀୟ ଜନତା ପାର୍ଟି (ବିଜେପି) ସହିତ ହାତ ମିଳାଇଥିଲା। ଏହା ପରେ ଉଭୟ ଦଳ ନିଷ୍ପତ୍ତି ନେଇଥିଲେ ଯେ ସେମାନେ ମିଳିତ ଭାବେ ସ୍ଥାନୀୟ ନିର୍ବାଚନ ଏବଂ ୨୦୨୪ରେ ହେବାକୁ ଥିବା ଲୋକସଭା ଏବଂ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ। ହେଲେ ୨୦୨୩ ମସିହାରେ ଜନସେନା ପାର୍ଟିର ସମ୍ପର୍କ ଚନ୍ଦ୍ରବାବୁ ନାଇଡୁଙ୍କ ତେଲୁଗୁ ଦେଶମ ପାର୍ଟି ସହିତ ଭଲ ହେବାକୁ ଲାଗିଲା। ଏବେ ଅଭିନେତା ଏନଡିଏଠାରୁ ନିଜ ଦଳକୁ ଅଲଗା କରିଥିବା ସହ ତେଲୁଗୁ ଦେଶମ ପାର୍ଟି ଏବଂ ଚନ୍ଦ୍ରବାବୁ ନାଇଡୁଙ୍କୁ ଖୋଲାଖୋଲି ଭାବେ ସମର୍ଥନ କରିଛନ୍ତି। ଦୁଇ ଦିନ ପୂର୍ବେ ଜନସେନା ପାର୍ଟି ଆଗାମୀ ତେଲେଙ୍ଗାନା ବିଧାନସଭା ନିର୍ବାଚନରେ ୧୧୯ଟି ସିଟ୍ ମଧ୍ୟରୁ ୩୨ଟି ଆସନରେ ପ୍ରତିଦ୍ୱନ୍ଦ୍ୱିତା କରିବ ବୋଲି ଘୋଷଣା କରିଥିଲେ ପବନ।
