ଦୀର୍ଘ ୪୬ ବର୍ଷ ପରେ ଶେଷରେ ସ୍ୱାମୀଙ୍କ ପେନସନ ପାଇବେ କେନ୍ଦ୍ରାପଡ଼ା ଜିଲ୍ଲା କନ୍ଦରପୁରର ହର ସାହୁ – Utkal Mail

କେନ୍ଦ୍ରାପଡା: ଦୀର୍ଘ ୪୬ ବର୍ଷର ଅପେକ୍ଷା ପରେ ଶେଷରେ ସ୍ୱାମୀଙ୍କ ପେନସନ ପାଇବେ କେନ୍ଦ୍ରାପଡ଼ା ଜିଲ୍ଲା କନ୍ଦରପୁର ଗାଁର ୯୧ ବର୍ଷୀୟ ବିଧବା ମହିଳା ହର ସାହୁ। ତାଙ୍କ ସ୍ୱାମୀ କେନ୍ଦ୍ରାପଡ଼ାର ଦୁହୁରିଆ ସ୍କୁଲର ସହଯୋଗୀ ଶିକ୍ଷୟିତ୍ରୀ ବେଣୁଧର ସାହୁଙ୍କର ୧୯୭୭ ମସିହାରେ ଦେହାନ୍ତ ହୋଇଥିଲା। ସେବେଠାରୁ ହର ତାଙ୍କ ପରିବାର ପେନସନ ଅଧିକାର ପାଇଁ ଅନବରତ ଉଦ୍ୟମ କରି ଆସୁଛନ୍ତି। ସରକାରୀ କାର୍ଯ୍ୟାଳୟକୁ ଅନେକଥର ଚକ୍କର କାଟୁଥିଲେ ମଧ୍ୟ ସଫଳ ହୋଇନଥିଲେ।

ବାରମ୍ବାର ଚେଷ୍ଟା କରିବା ପରେ ମଧ୍ୟ ସରକାରୀ କର୍ତ୍ତୃପକ୍ଷ ତାଙ୍କ ଅନୁରୋଧକୁ ଗ୍ରହଣ କରିନପାରିବାରୁ ସେ ଆର୍ଥିକ ଅନଟନ ମଧ୍ୟରେ ଦିନ କାଟୁଛନ୍ତି। ଏହାପରେ ହର ସାହୁ କୋର୍ଟ ମାଧ୍ୟମରେ ନ୍ୟାୟ ପାଇବା ପାଇଁ ନିଷ୍ପତ୍ତି ନେଇଥିଲେ। ହାଇକୋର୍ଟ ମାମଲାର ଅନୁଧ୍ୟାନ କରିବା ପରେ ତାଙ୍କ ସପକ୍ଷରେ ରାୟ ଦେଇ ବକେୟା ଓ ସୁଧ ସହିତ ପେନସନ ପ୍ରଦାନ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।

ଦଶନ୍ଧି ଦଶନ୍ଧି ଧରି ପେଟ ପୋଷିବାକୁ ସଂଘର୍ଷ କରୁଥିବା ହରଙ୍କ ପାଇଁ କୋର୍ଟଙ୍କ ଏହି ନିଷ୍ପତ୍ତି ଆଶ୍ୱସ୍ତି ଆଣିଛି। ମୋ ସ୍ୱାମୀଙ୍କ ମୃତ୍ୟୁକୁ ୪୦ ବର୍ଷରୁ ଅଧିକ ସମୟ ବିତିଗଲାଣି, କିନ୍ତୁ ମୁଁ କେବେ ବି ତାଙ୍କ ପେନସନ ପାଇନାହିଁ। ଏତେ ବର୍ଷ ପରେ ଶେଷରେ ତାହା ମିଳିବା ଖୁସିର କଥା ବୋଲି ସେ କହିଛନ୍ତି।

ଓଡ଼ିଶା ସିଭିଲ୍ ସର୍ଭିସେସ୍ (ପେନସନ୍) ରୁଲ୍ ୧୯୯୨ର ରୁଲ୍ ୭୩(୧) ଅନୁଯାୟୀ ସରକାରୀ କର୍ମଚାରୀଙ୍କ ମୃତ୍ୟୁର ମାସକ ମଧ୍ୟରେ ଫ୍ୟାମିଲି ପେନସନ ମଞ୍ଜୁର ହେବା କଥା। କେବଳ ସେତିକି ନୁହେଁ, ପେନସନ ପ୍ରଦାନରେ ବିଳମ୍ବ ପାଇଁ ଦାୟୀ ବ୍ୟକ୍ତିବିଶେଷଙ୍କଠାରୁ ବାର୍ଷିକ ୧୮% ହାରରେ ସୁଧ ଆଦାୟ କରିବାକୁ ହାଇକୋର୍ଟ ୧୯୯୯ ମସିହାରେ ଏକ ଆଦେଶରେ ଓଡ଼ିଶା ପିଜି ଆଣ୍ଡ ପିଏ ବିଭାଗକୁ ନିର୍ଦ୍ଦେଶ ଦେଇଥିଲେ।

ପ୍ରଶାସନିକ ଅବହେଳା ଯୋଗୁ ଉପୟୁକ୍ତ ପେନସନ ପାଇବାରୁ ବଞ୍ଚିତ ହେଉଥିବା ବହୁ ବିଧବା ଓ ପରିବାରର ଚ୍ୟାଲେଞ୍ଜକୁ ହର ସାହୁଙ୍କ ମାମଲା ମନେପକାଇ ଦେଉଛି।