ହାଇଦ୍ରାବାଦ: କିଏ ସେ ହୈଦର? ଆମେ ବଦଳେଇବୁ ହାଇଦ୍ରାବାଦର ନାଁ । ହାଇଦ୍ରାବାଦର ନାଁ ପରିବର୍ତ୍ତେ ଭାଗ୍ୟନଗର ରଖାଯିବ । ୟୁପି ସିଏମ ଆଦିତ୍ୟ ନାଥ ଯୋଗୀଙ୍କ ପରେ ସ୍ଥାନର ପୁନଃ ନାମକରଣ ନେଇ ଏମିତି କିଛି କହିଛନ୍ତି ବିଜେପି ସାଂସଦ ଜି. କିଶାନ ରେଡ୍ଡୀ ।
ରେଡ୍ଡୀ ଆଜି (ସୋମବାର) କହିଛନ୍ତିଯେ, ‘ଯଦି ବିଜେପି ତେଲେଙ୍ଗାନାରେ ସତ୍ତାକୁ ଫେରେ ତେବେ ହାଇଦ୍ରାବାଦ ନାଁ ବଦଳେଇ ଭାଗ୍ୟନଗର ରଖାଯିବ । ମୁଁ ପଚାରୁଛି ହୈଦର କିଏ? ହୈଦର ର ନାମ ଆବଶ୍ୟକ କି? କେଉଁଠୁ ଆସିଲା ଏ ହୈଦର ? କିଏ ଏହି ହୈଦର କାହାର ଆବଶ୍ୟକ ଅଛି କି? ଯଦି ବିଜେପି କ୍ଷମତାକୁ ଆସେ, ତେବେ ନିଶ୍ଚିତ ଭାବେ ହୈଦରଙ୍କ ନାମ ହଟାଯିବ ଏବଂ ସହରର ନାମ ଭାଗ୍ୟନଗର ରଖାଯିବ ବୋଲି ସେ କହିଛନ୍ତି ।
ରେଡ୍ଡୀ କହିଛନ୍ତି ଯେ, ଯେତେବେଳେ ମାଡ୍ରାସର ନାମ ଚେନ୍ନାଇ, ବମ୍ବେ ର ନାମ ମୁମ୍ବାଇ, କୋଲକାତା ନାମ କଲିକତା ଏବଂ ରାଜପଥର ନାଁ କୁ କର୍ତ୍ତବ୍ୟ ପଥରେ ପରିବର୍ତ୍ତନ କରାଯାଇଛି, ତେବେ ହାଇଦ୍ରାବାଦର ନାମ ଭାଗ୍ୟନଗରରେ ପରିବର୍ତ୍ତନ କରିବାରେ ଅସୁବିଧା କ’ଣ? କେଟିଆର ଦାବି କରିଛି ଯେ ବିଜେପି ଜିତିବ ନାହିଁ କିନ୍ତୁ ସେ ଆହୁରି ମଧ୍ୟ କହିଛନ୍ତି ଯେ ସେ (କେଟିଆର) ଏବଂ ତାଙ୍କ ପିତା ସିଏମ କେସିଆର ନିଜେ ନିର୍ବାଚନରେ ହାରିବାକୁ ଯାଉଛନ୍ତି ।
‘ଯଦି ବିଜେପି କ୍ଷମତାକୁ ଆସେ, ତେବେ ଆମେ ସେହି ସବୁ ଜିନିଷ ବଦଳାଇବୁ ଯାହା ଦାସତ୍ୱର ମାନସିକତାକୁ ପ୍ରତିଫଳିତ କରିଥାଏ । ସେ କହିଛନ୍ତି ଯେ ନାମ ପରିବର୍ତ୍ତନକୁ ନେଇ ବିଜେପି ପଣ୍ଡିତମାନଙ୍କ ମତ ମଧ୍ୟ ଗ୍ରହଣ କରିବ । ନିକଟରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତେଲେଙ୍ଗାନାରେ ତାଙ୍କ ନିର୍ବାଚନ ରାଲିରେ କହିଛନ୍ତି ଯେ ହାଇଦ୍ରାବାଦକୁ ଭାଗ୍ୟନଗର ଏବଂ ମହାବୁବନଗରକୁ ପାଲାମୁରୁ ନାମରେ ନାମିତ କରାଯିବା ଉଚିତ୍ ।
