ଅହମଦାବାଦ: ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ସୁନୀଲ ଗାଭାସ୍କର ଗୁଜୁରାଟର ସୁରଟ ସ୍ଥିତ ‘ସଚିନ୍’ ରେଳ ଷ୍ଟେସନ୍ ବୁଲିବା ବେଳେ କ୍ରିକେଟର ସଚିନ ତେନ୍ଦୁଲକରଙ୍କୁ ପ୍ରଶଂସା କରିଛନ୍ତି। ଗାଭାସ୍କର ଷ୍ଟେସନର ଏକ ଫଟୋ ସୋସିଆଲ ମିଡିଆରେ ସେୟାର କରି ଏହି ମହାନ କ୍ରିକେଟରଙ୍କ ନାଁରେ ଷ୍ଟେସନର ନାମକରଣ କରିଥିବା ଲୋକଙ୍କ ଦୂରଦୃଷ୍ଟି ଉପରେ ଆଲୋକପାତ କରିଛନ୍ତି।
ସେ ତାଙ୍କ ଫଟୋର କ୍ୟାପସନରେ ଲେଖିଛନ୍ତି, ଆମ ଖେଳର ସର୍ବକାଳୀନ ମହାନ ଖେଳାଳି ଏବଂ ମୋର ପ୍ରିୟ କ୍ରିକେଟରଙ୍କ ନାମରେ ସୁରଟ ନିକଟରେ ଏକ ରେଳ ଷ୍ଟେସନର ନାମକରଣ ପାଇଁ କିଛି ଲୋକଙ୍କ ଦୂରଦୃଷ୍ଟି ଥିଲା। କିନ୍ତୁ ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ସେ ମୋର ପ୍ରିୟ ବ୍ୟକ୍ତି।
ଷ୍ଟେସନର ନାଁ ପାଖ ଗାଁରୁ ଆସିଥିବା ଅନୁମାନ କରାଯାଉଥିବା ବେଳେ ଏହି ଗସ୍ତ ସମୟରେ ଗାଭାସ୍କରଙ୍କ ଠାରେ ଛୋଟ ପିଲାଙ୍କ ଭଳି ଉତ୍ସାହ ଦେଖିବାକୁ ମିଳିଥିଲା।
ଗାଭାସ୍କର କହିଛନ୍ତି, ମୁଁ ସଚିନଙ୍କୁ ସବୁବେଳେ ପ୍ରଶଂସା କରିଆସିଛି, କେବଳ ଜଣେ କ୍ରିକେଟର ଭାବେ ନୁହେଁ, ବରଂ ଜଣେ ବ୍ୟକ୍ତି ଭାବେ ମଧ୍ୟ। ସେ ଲକ୍ଷ ଲକ୍ଷ ଲୋକଙ୍କ ପାଇଁ ପ୍ରେରଣା, ଏବଂ ମୁଁ ଭାଗ୍ୟବାନ ଯେ ମୁଁ ତାଙ୍କୁ ଅନେକ ବର୍ଷ ଧରି ମୋର ବନ୍ଧୁ ବୋଲି କହୁଛି।
ଟେଷ୍ଟ କ୍ରିକେଟରେ ୧୦ ହଜାର ରନ୍ ପୂରଣ କରିବାରେ ପ୍ରଥମ ଖେଳାଳି ହେବାର ରେକର୍ଡ ରଖିଥିବା ଗାଭାସ୍କର ଏହି ଅବସରରେ ତେନ୍ଦୁଲକରଙ୍କ ଅବଦାନକୁ ମନେ ପକାଇଥିଲେ। ଗାଭାସ୍କର କହିଛନ୍ତି, “ସଚିନ ସବୁଠାରୁ ମହାନ ବ୍ୟାଟର”।
ଉଭୟ ଟେଷ୍ଟ ଓ ଦିନିକିଆ କ୍ରିକେଟରେ ସର୍ବାଧିକ ରନର ରେକର୍ଡ ରଖିଥିବା ତେନ୍ଦୁଲକର ଥରେ ବଡ଼ ହେବା ସମୟରେ ତାଙ୍କ ବ୍ୟାଟିଂ ହିରୋ ଗାଭାସ୍କରଙ୍କ ସହ ଖେଳିବାକୁ ସୁଯୋଗ ନମିଳିବା ନେଇ ଦୁଃଖ ପ୍ରକାଶ କରିଥିଲେ।
ସୁନୀଲ ଗାଭାସ୍କରଙ୍କ ସହ ଖେଳିବା ନେଇ ସେ ସବୁବେଳେ ସ୍ୱପ୍ନ ଦେଖୁଥିଲେ ବୋଲି ତେନ୍ଦୁଲକର କୁହନ୍ତି। ସେ ମୋର ଆଦର୍ଶ ଥିଲେ ଏବଂ ମୁଁ ତାଙ୍କ ଠାରୁ ବହୁତ କିଛି ଶିଖିଥିଲି। ମୋ କ୍ୟାରିୟରରେ ତାଙ୍କ ମାର୍ଗଦର୍ଶନ ଓ ସମର୍ଥନ ପାଇଁ ମୁଁ କୃତଜ୍ଞ।”
