କଟକ: ଜୀବିତ ଝିଅ ପାୟଲ ମହାପାତ୍ରର ଶେଷକୃତ୍ୟ ସମ୍ପନ୍ନ କରିଛନ୍ତି ତାଙ୍କ ପରିବାର। ପାୟଲ ତାଙ୍କ ଟ୍ୟୁସନ ଶିକ୍ଷକ ଆକାଶଙ୍କ ସହ ପଳାଇବା ପରେ ଅସନ୍ତୋଷ ପ୍ରକାଶ କରି ଏଭଳି ଚରମ ପଦକ୍ଷେପ ନେଇଛନ୍ତି ତାଙ୍କ ପରିବାର। କଟକ ଭଦ୍ରଶ୍ବେର ଥାନା ଅଞ୍ଚଳର ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
ପାୟଲ ନିଖୋଜ ଥିବା ନେଇ ତାଙ୍କ ବାପା ବିଶ୍ୱଜିତ ମହାପାତ୍ର ପ୍ରଥମେ ଥାନାରେ ଏତଲା ଦେଇଥିଲେ। ଏହାପରେ ପାୟଲ ଏକ ଭିଡିଓ ବାର୍ତ୍ତା ଜାରି କରି କହିଥିଲେ, ସେ କେଉଁଠି ଅଛନ୍ତି ଏବଂ ସେ ସୁରକ୍ଷିତ ଅଛନ୍ତି ଏବଂ ନିଜ ଇଚ୍ଛାରେ ଘର ଛାଡି ଚାଲିଆସିଛନ୍ତି।
ଏହି ଖବର ଶୁଣିବା ପରେ ପାୟଲଙ୍କ ପରିବାର ଲୋକେ ଭୀଷଣ ରାଗି ଯାଇଥିଲେ। ଏପରିକି ଝିଅର ମୃତ୍ୟୁ ହୋଇଛି ବୋଲି ଘୋଷଣା କରିଥିଲେ। ଏହାପରେ ଏକ ପାରମ୍ପରିକ ରିତିନୀତି ଅନୁଯାୟୀ ‘ଶୁଦ୍ଧି’ ସମାରୋହର ଆୟୋଜନ କରିଥିଲେ। ଯାହା ‘ମୃତ’ ବିବେଚିତ ବ୍ୟକ୍ତିଙ୍କ କ୍ରିୟାକ୍ରମରେ ହୁଏ।
ଝିଅର ବାପା ବିଶ୍ୱଜିତ ମହାପାତ୍ର କହିଛନ୍ତି, ଝିଅଟିଏ ଯଦି ପରିବାରର ପକ୍ଷ ନନେବ ତେବେ ସେ କେବେ କାହାକୁ ସମର୍ଥନ କରିବ ନାହିଁ। ମୁଁ ଏପରି ଏକ ପଦକ୍ଷେପ ନେଇଛି କାରଣ ମୁଁ ଚାହେଁ ଯେ ଅନ୍ୟ ପରିବାରର ପୁଅ କିମ୍ବା ଝିଅମାନେ ମୋ ଝିଅ ଦ୍ୱାରା କରାଯାଇଥିବା ଭଳି ଭୁଲ କରନ୍ତୁ ନାହିଁ। ଏହା ସାଧାରଣ ଜନତାଙ୍କ ପାଇଁ ଏକ ବାର୍ତ୍ତା।
ତେବେ ପାୟଲ ତାଙ୍କ ଭିଡିଓ ମେସେଜରେ ତାଙ୍କ ବାପାଙ୍କ କଥାକୁ ଖଣ୍ଡନ କରିଛନ୍ତି। ପରିବାର ପକ୍ଷରୁ ତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦିଆଯାଉଥିବା ବେଳେ ଏହି ନିର୍ଯାତନାରୁ ରକ୍ଷା ପାଇବା ପାଇଁ ସେ ଘର ଛାଡି ପଳାଇଥିବା କହିଛନ୍ତି। ସେ ନିଜକୁ 18 ବର୍ଷରୁ ଉର୍ଦ୍ଧ୍ୱ ବୋଲି ମଧ୍ୟ ଦାବି କରିଛନ୍ତି ଏବଂ ନିଜ ନିଷ୍ପତ୍ତି ନିଜେ ନେବାକୁ ସକ୍ଷମ ବୋଲି କହିଛନ୍ତି।
