Ranbir Kapoor in Durga Puja : ଦୁର୍ଗାପୂଜା ପେଣ୍ଡାଲରେ ପହଞ୍ଚିଲେ ରଣବୀର କପୁର, ମା’ଙ୍କ ଆଶୀର୍ବାଦ ନେଇ ଗାଇଲେ ଗୀତ
ବଲିଉଡ୍ ଅଭିନେତା ରଣବୀର କପୁର ଏବେ ନିର୍ଦ୍ଦେଶକ ନିତେଶ ତିୱାରୀଙ୍କ ଆଗାମୀ ଫିଲ୍ମ ରାମାୟଣକୁ ନେଇ ରହିଛନ୍ତି । ରାମାୟଣ ଫିଲ୍ମରେ ରଣବୀର ପ୍ରଭୁ ଶ୍ରୀରାମଙ୍କ ଭୂମିକାରେ ନଜର ଆସିବେ । ନଭେମ୍ବର ୫ ତାରିଖରେ ଫିଲ୍ମ ରିଲିଜ ହେବାକୁ ଥିବା ବେଳେ ରଣବୀର ଏବେ ପ୍ରଚାରରେ ବ୍ୟସ୍ତ ରହିଛନ୍ତି । ତେବେ ଫିଲ୍ମ ପ୍ରମୋସନରୁ ସମୟ ବାହାର କରି ସେ ମୁଖାର୍ଜୀ ପରିବାରର ଦୁର୍ଗାପୂଜାରେ ସାମିଲ ହୋଇଛନ୍ତି ।
ରଣବୀର ମୁମ୍ବାଇର ନର୍ଥ ବମ୍ବେ ସାର୍ବଜନୀନ ଦୁର୍ଗାପୂଜା ମଣ୍ଡପରେ ପହଞ୍ଚି ମା’ ଦୁର୍ଗାଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ । ମଣ୍ଡପରେ ପହଞ୍ଚିବା ପରେ ପ୍ରଥମେ ପୁରୋହିତଙ୍କ ପାଦ ଛୁଇଁ ଆଶୀର୍ବାଦ ନେଇଥିଲେ ରଣବୀର । ପୁରୋହିତଙ୍କଠାରୁ ଟିକା ଲଗାଇବା ପରେ ନିଜର ଘନିଷ୍ଠ ବନ୍ଧୁ ଆୟାନ ମୁଖାର୍ଜୀଙ୍କ ସମେତ ପରିବାରର ଅନ୍ୟ ସଦସ୍ୟଙ୍କୁ ଭେଟିଥିଲେ ।
ଦୁର୍ଗାପୂଜା ମଣ୍ଡପରେ ରଣବୀର ଗାୟିକା ହର୍ଷଦୀପଙ୍କ ସହ ମଞ୍ଚରେ ଗୀତ ଗାଇଥିଲେ । ନିଜ ଅଭିନୀତ ଲୋକପ୍ରିୟ ଫିଲ୍ମ ୟେ ଜୱାନୀ ହୈ ଦିୱାନୀର ପ୍ରସିଦ୍ଧ ଗୀତ କବୀରା ଗାଇ ଉପସ୍ଥିତ ଦର୍ଶକଙ୍କ ମନ ଜିଣିଥିଲେ । ଏହି ଅବସରରେ ରଣବୀର ଏକ ପାରମ୍ପରିକ ପୋଷାକ ପିନ୍ଧିଥିଲେ । ସେ ନାଲି ଓ ସୁନେଲି ରଙ୍ଗର କୁର୍ତ୍ତା ସହ ଧଳା ପାଇଜାମା ପିନ୍ଧିଥିଲେ ।
ମୁମ୍ବାଇର ନର୍ଥ ବମ୍ବେ ସାର୍ବଜନୀନ ଦୁର୍ଗାପୂଜା ମଣ୍ଡପ ସହରର ଅନ୍ୟତମ ପ୍ରସିଦ୍ଧ ପୂଜା ମଣ୍ଡପ । ପ୍ରତିବର୍ଷ ମୁଖାର୍ଜୀ ପରିବାରର ସଦସ୍ୟ କାଜୋଲ ଓ ରାଣୀ ମୁଖାର୍ଜୀଙ୍କ ସମେତ ଅନେକ ବଲିଉଡ୍ କଳାକାର ଏଠାରେ ମା’ ଦୁର୍ଗାଙ୍କ ଦର୍ଶନ ପାଇଁ ପହଞ୍ଚିଥାନ୍ତି ।
