ଭୁବନେଶ୍ବର: ଅଷ୍ଟ୍ରେଲିଆ ବିପକ୍ଷ ଦ୍ବିତୀୟ ଦିନିକିଆରେ ଶତକୀୟ ପାଳି ଖେଳିଥିବା ଯୁବ ବ୍ୟାଟର ଶୁବମନ ଗିଲ୍ ଆସନ୍ତା ବିଶ୍ବକପ୍ରେ ୧ ନମ୍ବର ମାନ୍ୟତା ପାଇବା ଯଥେଷ୍ଟ ସମ୍ଭାବନା ରହିଛି। ବର୍ତ୍ତମାନ ସୁଦ୍ଧା ବାବର ଆଜମ୍ ୮୫୭ ରେଟିଂ ପଏଣ୍ଟ ପାଇ ଶୀର୍ଷ ସ୍ଥାନରେ ଥିବା ବେଳେ ଗିଲ୍ ୮୧୪ ପଏଣ୍ଟରେ ତାଙ୍କ ପଛକୁ ରହିଛନ୍ତି। ପ୍ରତ୍ୟେକ ମ୍ୟାଚ୍ରେ ଶୁବମନ ଦମ୍ଦାର ପ୍ରଦର୍ଶନ ଦେଉଥିବାରୁ ଶୀର୍ଷ ମାନ୍ୟତାର ନିକଟତର ହେଲେଣି। କିନ୍ତୁ ତୃତୀୟ ଦିନିକିଆରେ ତାଙ୍କୁ ବିଶ୍ରାମ ଦିଆଯାଇଥିବାରୁ କେବଳ ବିଶ୍ବକପ୍ରେ ହିଁ ବାବରଙ୍କୁ ଟପିବା ପାଇଁ ଗିଲ୍ଙ୍କ ପାଖରେ ସୁଯୋଗ ରହିବ। ଶୀର୍ଷ ମାନ୍ୟତାରେ ପହଞ୍ଚିବାକୁ ହେଲେ ଗିଲ୍ଙ୍କୁ ଆଉ ଗୋଟିଏ ପାଳିରୁ ମାତ୍ର ୨୨ ରନ୍ ସଂଗ୍ରହ କରିବାକୁ ପଡ଼ିବ।
ଦୀର୍ଘ ଦିନ ଧରି ଦିନିକିଆ ମାନ୍ୟତାର ଶୀର୍ଷ ସ୍ଥାନ ଦଖଲ କରି ଆସୁଥିବା ବାବରଙ୍କ ଏହି କୀର୍ତ୍ତିକୁ ଏବେ ଗିଲ୍ ଟଳମଳ କରିବା ଆରମ୍ଭ କଲେଣି। ଗୋଟିକ ପରେ ଗୋଟିଏ ମାନ୍ୟତା ଶିଡ଼ି ଚଢୁଥିବା ଗିଲ୍ଙ୍କୁ ୧ ନମ୍ବର ବ୍ୟାଟର୍ ହେବାକୁ ହେଲେ ଆଉ ୪୩ ପଏଣ୍ଟର ଆବଶ୍ୟକତା ରହିଛି। ଚଳିତ ବର୍ଷ ଖେଳିଥିବା ମ୍ୟାଚ୍ଗୁଡ଼ିକୁ ନଜର ପକାଇଲେ ଗିଲ୍ଙ୍କ ପ୍ରଦର୍ଶନ ଉଚ୍ଚକୋଟୀର ରହିଛି। ଏସିଆ କପ୍ରେ ୭୫.୫୦ ହାରରେ ୩୦୨ ରନ୍ କରି ସର୍ବାଧିକ ସ୍କୋରର ହୋଇପାରିଥିଲେ। ତାଙ୍କର ସ୍ଥିର ପ୍ରଦର୍ଶନ ବିଷୟରେ କ୍ରିକେଟ୍ ପଣ୍ଡିତମାନେ ନିୟମିତ ଚର୍ଚ୍ଚା କରୁଛନ୍ତି। ତେଣୁ ତାଙ୍କୁ ଭାରତର ପରବର୍ତ୍ତୀ ବିରାଟ କୋହଲି ଭାବେ ଆକଳନ କରାଯିବା ସହ ବିଶ୍ବର ଶ୍ରେଷ୍ଠ ବ୍ୟାଟର୍ ଭାବେ ପରିଗଣିତ ହେବାକୁ ଆଉ ଅଧିକ ଦିନ ଅପେକ୍ଷା କରିବାକୁ ପଡ଼ିବ ନାହିଁ ବୋଲି କୁହାଯାଉଛି। ବରିଷ୍ଠ ଖେଳାଳି କୋହଲି ଓ ରୋହିତ ଶର୍ମାଙ୍କ ଅନୁପସ୍ଥିତିରେ ଗିଲ୍ ଭାରତୀୟ ବ୍ୟାଟିଂ କ୍ରମରେ ସବୁଠୁ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିବେ। ନିଜ ସ୍କୋରକୁ ବଢ଼ାଇବା ସହ ମଜବୁତ୍ ଭାଗୀଦାରି ଗଢ଼ିବାର ଦକ୍ଷତା ତାଙ୍କୁ ଏଭଳି ବ୍ୟକ୍ତିତ୍ବ ଭାବେ ଗଢ଼ି ତୋଳିଛି।
ଅପରପକ୍ଷେ ବାବର ଆଜମ୍ଙ୍କ ପାଇଁ ଏସିଆ କପ୍ ଅତ୍ୟନ୍ତ ନୈରାଶ୍ୟଜନକ ରହିଥିଲା। କେବଳ ପୂର୍ବରୁ ପାଇଥିବା ରେଟିଂ ଯୋଗୁଁ ଶୀର୍ଷ ସ୍ଥାନ କାଏମ୍ ରଖିପାରିଛନ୍ତି। ହେଲେ ଗିଲ୍ ଯେଉଁଭଳି ଗତିରେ ତାଙ୍କ ନିକଟର ହେଲେଣି, ଏଥିରୁ ସ୍ପଷ୍ଟ ଜଣାପଡୁଛି ଯେ, ୧ ନମ୍ବର ସ୍ଥାନ ବାବରଙ୍କ ପାଇଁ ଆଉ ଅଧିକ ଦିନ ସୁରକ୍ଷିତ ନୁହେଁ। ତଥାପି ବାବରଙ୍କ ଭାଗ୍ୟ ହେଉ କି ଭାରତୀୟ ଦଳର ପରିଚାଳନା ଗୋଷ୍ଠୀର ପରୀକ୍ଷା ନିରୀକ୍ଷା ପାଇଁ ଏହି ପାକିସ୍ତାନୀ ବ୍ୟାଟର ଟିକେ ଆଶ୍ବସ୍ତିରେ ରହିବେ। ଅଷ୍ଟ୍ରେଲିଆ ବିପକ୍ଷ ତୃତୀୟ ଦିନିକିଆରେ ଗିଲ୍ ଖେଳିନଥିବାରୁ ବିଶ୍ବକପ୍ରେ ବାବର ଶୀର୍ଷ ମାନ୍ୟତାର ଖେଳାଳି ଭାବେ ପ୍ରବେଶ କରିବେ। ଅଷ୍ଟ୍ରେଲିଆ ବିପକ୍ଷ ଶୃଙ୍ଖଳା ପୂର୍ବରୁ ସେ ଏହି ବ୍ୟବଧାନରେ ଥିଲେ। ଶୀର୍ଷ ସ୍ଥାନ ପାଇବାକୁ ହେଲେ ତାଙ୍କୁ ତିନିଟି ପାଳିରୁ ୨୦୦ ରନ୍ର ଆବଶ୍ୟକତା ରହୁଥିଲା। ପ୍ରଥମ ଦୁଇ ମ୍ୟାଚ୍ରେ ଯଥାକ୍ରମେ ୭୪ ଓ ୧୦୪ ରନ୍ କରି ନିଜ ଦକ୍ଷତାର ପ୍ରମାଣ ଦେଇଛନ୍ତି। ରାଜକୋଟରେ ତାଙ୍କୁ ଆଉ ମାତ୍ର ୨୨ ରନ୍ର ଆବଶ୍ୟକତା ରହୁଛି। ହେଲେ ଗିଲ୍ ତୃତୀୟ ମ୍ୟାଚ୍ ଖେଳିନଥିବାରୁ ବାବର ଚନ୍ତାମୁକ୍ତ ରହିବେ। କେବଳ ଏତିକି ନୁହେଁ, ଆଇସିସି ମାନ୍ୟତା ବ୍ୟତୀତ ଚଳିତ ବର୍ଷ ଦିନିକିଆରେ ଶତକୀୟ ଭାଗୀଦାରି କରିବାରେ ମଧ୍ୟ ଗିଲ୍ ଏବେ ବାବରଙ୍କୁ ଟପିସାରିଲେଣି। ଅଷ୍ଟ୍ରେଲିଆ ବିପକ୍ଷ ଦ୍ବିତୀୟ ଦିନିକିଆରେ ଶ୍ରେୟସ ଆୟରଙ୍କ ସହ ମିଶି ଗିଲ୍ ଦ୍ବିଶତୀୟ (୨୦୦ ରନ୍, ୧୬୪ ବଲ୍) ଭାଗୀଦାରି କରିବା ଦ୍ବାରା ମୋଟ୍ ୭ ଶତକୀୟ ଭାଗୀଦାରିରେ ସେ ସାମିଲ ହୋଇଛନ୍ତି। କିନ୍ତୁ ବାବର ମାତ୍ର ୬ ଶତକୀୟ ଭାଗୀଦାରି କରିଛନ୍ତି।
ସଚିନଙ୍କ କୀର୍ତ୍ତିମାନ ଉପରେ ଗିଲ୍ଙ୍କ ନଜର
-ଚଳିତ ବର୍ଷ ୨୦ ମ୍ୟାଚ୍ରୁ ଗିଲ୍ ୫ ଶତକ ଅର୍ଜନ କଲେଣି। ସଚିନ୍ ୧୯୯୮ରେ ୩୪ ମ୍ୟାଚ୍ରୁ ୯ ଶତକ ମାରିଥିଲେ। ଯଦି ଗିଲ୍ ଚଳିତ ବର୍ଷ ଆଉ ୪ ଶତକ ମାରନ୍ତି, ତାହେଲେ ଭାରତୀୟ କିଂବଦନ୍ତିଙ୍କ ସମକକ୍ଷ ହୋଇଯିବେ।
-ସଚିନ୍ଙ୍କ ଆଉ ଏକ କୀର୍ତ୍ତିମାନ ଭାଙ୍ଗିବା ନିକଟତର ହେଲେଣି ଗିଲ୍। ଯଦି ଗିଲ୍ ଚଳିତ ବର୍ଷ ଆଉ ୬୬୪ ରନ୍ ସଂଗ୍ରହ କରନ୍ତି ତାହେଲେ ସଚିନ୍ଙ୍କ ଗୋଟିଏ କ୍ୟାଲେଣ୍ଡର ବର୍ଷରେ କରିଥିବା ରନ୍ କୀର୍ତ୍ତିମାନ (୧୮୯୪) କୁ ଟପିଯିବେ। ଗିଲ୍ ବର୍ତ୍ତମାନ ୨୦ ମ୍ୟାଚ୍ରୁ ୧୨୩୦ ରନ୍ କରିସାରିଲେଣି। କୀର୍ତ୍ତିମାନ ଭାଙ୍ଗିବାକୁ ତାଙ୍କ ପାଖରେ ଆହୁରି ପାଖାପାଖି ୧୪ ମ୍ୟାଚ୍ ରହିଛି।
