ବେଜିଂ: ଚୀନରେ ପୁଣି ଡରାଇବାରେ ଲାଗିଛି କରୋନା । ଦେଶରେ କୋଭିଡ୍ ମହାମାରୀ ଆରମ୍ଭ ହେବା ପରଠାରୁ ଦିନକରେ ରେକର୍ଡ ମାମଲା ରିପୋର୍ଟ ହୋଇଛି । ଚୀନର ଜାତୀୟ ସ୍ୱାସ୍ଥ୍ୟ ବ୍ୟୁରୋ କହିଛି ଯେ ବୁଧବାର ଦେଶରେ ୩୧,୪୫୪ ମାମଲା ରିପୋର୍ଟ ହୋଇଛି । ସେଥିମଧ୍ୟରୁ ୨୭,୫୧୭ ମାମଲା ବିନା ଲକ୍ଷଣର । ଚୀନରେ କରୋନାକୁ ରୋକିବା ପାଇଁ ଲକଡାଉନ୍, ଗଣ ପରୀକ୍ଷଣ ଏବଂ ଯାତ୍ରା ପ୍ରତିବନ୍ଧକ ଭଳି ପଦକ୍ଷେପ କଡ଼ା ଗ୍ରହଣ କରାଯାଉଛି |
ଯଦିଓ ଚାଇନାର ୧୪୦ କୋଟି ଜନସଂଖ୍ୟା ତୁଳନାରେ କରୋନାର ନୂଆ ମାମଲା ବହୁତ କମ୍, ତେବେ ବେଜିଂର କଠୋର ଜିରୋ କୋଭିଡ୍ ନୀତି ଅନୁଯାୟୀ ମାମଲାରେ ସାମାନ୍ୟ ବୃଦ୍ଧି ଘଟିଲେ ମଧ୍ୟ ଲକଡାଉନ୍ ଏବଂ ସଂକ୍ରମିତ ରୋଗୀଙ୍କ ସଂସ୍ପର୍ଶରେ ଆସୁଥିବା ଲୋକଙ୍କୁ କ୍ବାରେଣ୍ଟାଇନରେ ରଖାଯାଉଛି । ଜିରୋ କୋଭିଡ୍ ନୀତି ଯୋଗୁଁ ଲୋକଙ୍କ ମଧ୍ୟରେ ଅସନ୍ତୋଷ ମଧ୍ୟ ବଢ଼ୁଛି | ଏଥିପାଇଁ ବିଶ୍ବର ଦ୍ୱିତୀୟ ବୃହତ୍ତମ ଅର୍ଥନୀତିରେ ବିକ୍ଷୋଭ ପ୍ରଦର୍ଶନ ଦେଖିବାକୁ ମିଳିଛି।
