ଆଜିର ଦିନରେ ସ୍ମାର୍ଟଫୋନ୍ ଆମ ଜୀବନର ଏକ ଜରୁରୀ ଅଂଶ ପାଲଟିଯାଇଛି। ବ୍ୟାଙ୍କିଙ୍ଗ୍, ଅନଲାଇନ୍ ସପିଂ, କଥାବାର୍ତ୍ତାଠାରୁ ଆରମ୍ଭ କରି ମନୋରଞ୍ଜନ ପର୍ଯ୍ୟନ୍ତ, ପ୍ରାୟ ସବୁ କାମ ପାଇଁ ଆମେ ଫୋନ୍ ବ୍ୟବହାର କରୁଛୁ । ତେବେ ବଜାରକୁ ନୂଆ ଫୋନ୍ ଆସିଲେ ହିଁ ପୁରୁଣା ଫୋନ୍ ବଦଳାଇବା ଜରୁରୀ ନୁହେଁ । ଭଲ ଫୋନ୍କୁ ଅନେକ ବର୍ଷ ପର୍ଯ୍ୟନ୍ତ ଆରାମରେ ବ୍ୟବହାର କରିହେବ । କିନ୍ତୁ ସମୟ ବଢ଼ିବା ସହିତ ଫୋନର ବ୍ୟାଟେରୀ, ସ୍କ୍ରିନ୍ କିମ୍ବା ଅନ୍ୟ ପାର୍ଟରେ ସମସ୍ୟା ଦେଖାଦେଇପାରେ । ଏପରି ସ୍ଥିତିରେ ସବୁବେଳେ ନୂଆ ଫୋନ୍ କିଣିବା ଆବଶ୍ୟକ ନାହିଁ । ଖରାପ ପାର୍ଟ ବଦଳାଇ ଫୋନକୁ ପୁଣି ଅଧିକ ବର୍ଷ ପର୍ଯ୍ୟନ୍ତ ବ୍ୟବହାର କରିହେବ।
ବ୍ୟାଟେରୀ ଶୀଘ୍ର ସରୁଛି କି?
ଫୋନର ବ୍ୟାଟେରୀ ସମୟ ସହିତ ଦୁର୍ବଳ ହୋଇଯାଏ । ଯଦି ଫୋନ୍ ପୂର୍ବ ଅପେକ୍ଷା ଶୀଘ୍ର ଡିସଚାର୍ଜ ହେଉଛି, ତେବେ ଏଥିପାଇଁ ପୂରା ଫୋନ୍ ବଦଳାଇବା ଦରକାର ନାହିଁ। ପ୍ରଥମେ ବ୍ୟାଟେରୀ ବଦଳାଇବାର ବିକଳ୍ପ ଦେଖନ୍ତୁ । ଭଲ ବ୍ୟାଟେରୀ ଲଗାଇବା ପରେ ପୁରୁଣା ଫୋନକୁ ଆହୁରି କିଛି ବର୍ଷ ବ୍ୟବହାର କରିହେବ। ସେହିପରି ଫୋନର ସ୍କ୍ରିନ୍ ଭାଙ୍ଗିଗଲେ କିମ୍ବା ଅନ୍ୟ କୌଣସି ପାର୍ଟ ଖରାପ ହେଲେ ମଧ୍ୟ ପ୍ରଥମେ ରିପେୟାର କରିବା କଥା ଚିନ୍ତା କରନ୍ତୁ । ଅନେକ ସମୟରେ ନୂଆ ଫୋନ୍ କିଣିବା ଅପେକ୍ଷା ପାର୍ଟ ବଦଳାଇବା ଶସ୍ତା ପଡ଼ିଥାଏ ।
ପୁରୁଣା ଫୋନ୍ କ୍ଷେତ୍ରରେ କେବଳ ହାର୍ଡୱେର୍ ନୁହେଁ, ସଫ୍ଟୱେର୍ ମଧ୍ୟ ଅଧିକ ଗୁରୁତ୍ୱପୂର୍ଣ୍ଣ । କିଛି ବର୍ଷ ପରେ କମ୍ପାନୀଗୁଡ଼ିକ ପୁରୁଣା ମଡେଲ୍ ପାଇଁ ସଫ୍ଟୱେର୍ ଏବଂ ସିକ୍ୟୁରିଟି ଅପଡେଟ୍ ଦେବା ବନ୍ଦ କରିଦିଅନ୍ତି। ଏହା ଏକ ବଡ଼ ସମସ୍ୟା ହୋଇପାରେ । କାରଣ ଫୋନରେ ଆମର ବ୍ୟାଙ୍କିଙ୍ଗ୍ ଡାଟା, ପରସ୍ନାଲ୍ ଚାଟ୍ ଏବଂ ଅନ୍ୟ ଜରୁରୀ ଇନଫରମେସନ୍ ରହିଥାଏ ।
ତେଣୁ ଯଦି ଆପଣଙ୍କ ପୁରୁଣା ଫୋନକୁ ଆଉ ସିକ୍ୟୁରିଟି ଅପଡେଟ୍ ମିଳୁନାହିଁ, ତେବେ କେବଳ ଫୋନ୍ ଚାଲୁଛି ବୋଲି ଏହାକୁ ବ୍ୟବହାର କରିଚାଲିବା ଠିକ୍ ନୁହେଁ । ଫୋନ୍ ଅଧିକ ପୁରୁଣା ହେଲେ ଏହାର ବ୍ୟାଟେରୀ, ସ୍କ୍ରିନ୍ ଏବଂ ଅନ୍ୟ ପାର୍ଟ ବଜାରରେ ସହଜରେ ମିଳିନପାରେ । ଫଳରେ ଫୋନ୍ ରିପେୟାର କରିବା କଷ୍ଟକର ହୋଇପାରେ। ଯଦି ପାର୍ଟ ମିଳୁନାହିଁ କିମ୍ବା ରିପେୟାର ପାଇଁ ଅଧିକ ଟଙ୍କା ଖର୍ଚ୍ଚ ହେଉଛି, ତେବେ ନୂଆ ଫୋନ୍ କିଣିବା ଭଲ ବିକଳ୍ପ ହୋଇପାରେ ।
ତେବେ ସ୍ମାର୍ଟଫୋନ୍ର କୌଣସି ନିର୍ଦ୍ଧିଷ୍ଟ ଏକ୍ସପାୟରୀ ଡେଟ୍ ନଥାଏ । ଯଦି ଆପଣଙ୍କ ଫୋନ୍ ଭଲ ଭାବେ କାମ କରୁଛି ଏବଂ ନିୟମିତ ସିକ୍ୟୁରିଟି ଅପଡେଟ୍ ମିଳୁଛି, ତେବେ କେବଳ ବଜାରରେ ନୂଆ ମଡେଲ୍ ଆସିଛି ବୋଲି ଫୋନ୍ ବଦଳାଇବା ଦରକାର ନାହିଁ । କିନ୍ତୁ ବ୍ୟାଟେରୀ, ସ୍କ୍ରିନ୍ କିମ୍ବା ଅନ୍ୟ ପାର୍ଟରେ ବଡ଼ ସମସ୍ୟା ରହିଛି, ରିପେୟାର ସମ୍ଭବ ନୁହେଁ କିମ୍ବା ସିକ୍ୟୁରିଟି ଅପଡେଟ୍ ବନ୍ଦ ହୋଇଯାଇଛି, ତେବେ ଫୋନ୍ ବଦଳାଇବା ହିଁ ଭଲ ନିଷ୍ପତ୍ତି ହୋଇପାରେ ।
