ନୂଆଦିଲ୍ଳୀ: ପାକିସ୍ତାନକୁ ସମର୍ଥନ କରୁଥିବା ତୁର୍କୀର ସାମ୍ପ୍ରତିକ ରାଜନୈତିକ ମନୋଭାବ ଉପରେ ବଢ଼ୁଥିବା ଚିନ୍ତା ମଧ୍ୟରେ ଇଣ୍ଡିଗୋ ଅଗଷ୍ଟ ୩୧ ସୁଦ୍ଧା ତୁର୍କୀସ୍ ଏୟାରଲାଇନ୍ସ ସହିତ ଏହାର ଲିଜ୍ ଚୁକ୍ତିନାମା ସମାପ୍ତ କରିବ ବୋଲି ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ ପକ୍ଷରୁ ଶୁକ୍ରବାର ସୂଚନା ମିଳିଛି। ଯାତ୍ରୀ ସେବାରେ ବାଧା ଏଡାଇବା ପାଇଁ ବିମାନ କମ୍ପାନୀକୁ ଶେଷ ତିନି ମାସର ଅବଧି ପ୍ରଦାନ କରାଯିବା ପରେ ଏହି ନିଷ୍ପତ୍ତି ନିଆଯାଇଛି।
ବର୍ତ୍ତମାନ, ଇଣ୍ଡିଗୋ ତୁର୍କୀସ୍ ଏୟାରଲାଇନ୍ସରୁ ଦୁଇଟି ବୋଇଂ 777-300ER ବିମାନ ପରିଚାଳନା କରେ। ଯାହାକି ଦିଲ୍ଲୀ ଏବଂ ମୁମ୍ବାଇରୁ ଇସ୍ତାନବୁଲକୁ ସିଧାସଳଖ ଉଡ଼ାଣ ଭରିଥାଏ। ତୁର୍କୀସ୍ ଏୟାରଲାଇନ୍ସ ସହିତ ଇଣ୍ଡିଗୋର ଲିଜ୍ ଅନୁଯାୟୀ, ବିମାନ କମ୍ପାନୀ ଅନ୍ୟ ଏକ ଏୟାରଲାଇନ୍ସରୁ କକପିଟ୍ କ୍ରୁ ସହିତ ଏକ ବିମାନ ଭଡା ନେଇଥାଏ। କିନ୍ତୁ ନିଜର କ୍ୟାବିନ କ୍ରୁ ବ୍ୟବହାର କରେ।
ତୁର୍କୀସ୍ ଏୟାରଲାଇନ୍ସ ସହିତ ଇଣ୍ଡିଗୋର ଲିଜ୍ ଚୁକ୍ତିନାମା ମୂଳତଃ ମେ ୩୧ ତାରିଖରେ ଶେଷ ହେବାକୁ ଥିଲା। ଇଣ୍ଡିଗୋ ଛଅ ମାସ ବୃଦ୍ଧି ପାଇଁ ଅନୁରୋଧ କରିଥିଲା, କିନ୍ତୁ ନିୟାମକ ଏହାକୁ ପ୍ରତ୍ୟାଖ୍ୟାନ କରିଥିଲେ। ଏକ ବିବୃତିରେ, ବିମାନ ଚଳାଚଳ ନିୟାମକ କହିଛନ୍ତି ଯେ ତିନି ମାସର ବୃଦ୍ଧି କରାଯାଇଛି। ଯାହାକି ଅନ୍ତିମ।
ପାକିସ୍ତାନ ପ୍ରତି ତୁର୍କୀର ସମର୍ଥନ ଏବଂ ଏହି ମାସର ଆରମ୍ଭରେ ଆତଙ୍କବାଦୀ ଶିବିର ଉପରେ ଭାରତର ବିମାନ ଆକ୍ରମଣକୁ ନିନ୍ଦା କରିବା ପରେ ଏହି ପଦକ୍ଷେପ ନିଆଯାଇଛି, ଯାହା କୂଟନୈତିକ ସମ୍ପର୍କକୁ ତିକ୍ତ କରିଛି।
